Zvicra do të mbajë më 14 qershor një referendum për të vendosur nëse popullsia e vendit duhet të kufizohet në 10 milionë banorë deri në vitin 2050, njoftoi qeveria federale, përcjell Euronews.
Nisma është propozuar nga partia e djathtë konservatore Swiss People’s Party (SVP), e cila ka siguruar nënshkrimet e nevojshme për ta çuar çështjen në votim mbarëkombëtar.
Sipas Zyrës Federale të Statistikave, deri në fund të tremujorit të tretë të vitit 2025, Zvicra kishte rreth 9.1 milionë banorë. Rreth 30% e tyre janë persona të lindur jashtë vendit, kryesisht nga vendet e BE-së.
Propozimi parashikon që numri i banorëve rezidentë të përhershëm – përfshirë shtetasit zviceranë dhe të huajt me leje qëndrimi – të mos e kalojë shifrën 10 milionë deri në vitin 2050. Nëse popullsia arrin 9.5 milionë para këtij afati, qeveria do të ndërmarrë masa për ta frenuar rritjen, përmes kufizimeve në azil, bashkim familjar, dhënie lejesh qëndrimi apo rinegocim marrëveshjesh ndërkombëtare.
Mbështetësit argumentojnë se kjo do të ndihmonte në mbrojtjen e mjedisit, burimeve natyrore dhe sistemit social nga presioni i rritjes demografike.
Ndërsa kritikët theksojnë se ekonomia zvicerane mbështetet në fuqinë punëtore të huaj, sidomos në spitale, hoteleri, ndërtim dhe universitete, dhe paralajmërojnë se kufizime të tilla mund të bien ndesh me angazhimet ndërkombëtare të vendit.
Zvicra është pjesë e zonës Schengen Area, që lejon lëvizjen e lirë mes 29 vendeve evropiane, megjithëse nuk është anëtare e Bashkimit Evropian.
