Ka 1.6 milionë emigrantë të paligjshëm me urdhra përfundimtarë dëbimi në SHBA, rreth gjysma e të cilëve kanë dënime penale, ka deklaruar ushtruesi i detyrës së drejtorit të Agjencisë së Emigracionit dhe Doganave (ICE), Todd Lyons.
Lyons i njoftoi këto shifra gjatë një seance dëgjimore përpara Komisionit të Senatit për Sigurinë Kombëtare dhe Çështjet Qeveritare të enjten, në mes të kritikave intensive nga demokratët dhe aktivistët e krahut të majtë ndaj masave të rrepta të administratës së Presidentit Donald Trump kundër emigracionit të paligjshëm.
Nga ata me urdhra përfundimtarë dëbimi, afërsisht 800,000 kanë dënime penale, sipas shefit të ICE. Një urdhër përfundimtar dëbimi shënon pikën kur autoritetet amerikane lejohen ligjërisht të dëbojnë një të huaj që ka shkelur ligjet e emigracionit. Megjithatë, individët ende mund të apelojnë dëbimin ose të kërkojnë një shtyrje.
Lyons sqaroi se urdhrat në fjalë nuk janë lëshuar nga ICE apo Departamenti i Sigurisë Kombëtare, por kanë ardhur “përmes një gjyqtari të emigracionit në Departamentin e Drejtësisë, i cili është i ndarë nga ICE”.
Gjatë seancës, senatori republikan James Lankford mbrojti agjentët e ICE, duke argumentuar se ata “kanë ndaluar atë kaos” përmes punës së tyre dhe se mijëra arrestimet po ndodhin sipas rregullave, shkruan Rt.
Të enjten, shefi i kufirit i Trump, Tom Homan, njoftoi përfundimin e operacioneve të ICE në Minesotë.
“Një tërheqje e konsiderueshme ka filluar tashmë këtë javë dhe do të vazhdojë javën e ardhshme,” tha ai.
Guvernatori i Minesotës, Tim Walz, e mirëpriti njoftimin në një postim në X, duke këmbëngulur se “emigracioni është bërthama e asaj që jemi”. Sipas guvernatorit, do ketë një “rrugë të gjatë drejt rimëkëmbjes” për shtetin pas ngjarjeve të fundit.
Zëdhënësja e Shtëpisë së Bardhë, Abigail Jackson, i tha Fox Neës në fillim të kësaj jave se Trump po “mban premtimin e tij për të kryer operacionin më të madh të dëbimit masiv në histori”, i cili do përqendrohet te “më të këqinjtë e të këqijve mes emigrantëve kriminelë të paligjshëm”.
