Samiti i BE-së këtë të enjte, i cili synonte të paraqiste një front të bashkuar mbi politikën ekonomike, u shndërrua në një tension pas përjashtimit të Spanjës nga një rreth i ngushtë vendimmarrës.
Para fillimit zyrtar të samitit, liderët e 19 vendeve të BE-së zhvilluan një takim paraprak me Presidenten e Komisionit Evropian, Ursula von der Leyen. Ky format më i vogël ka bërë traditë në mëngjeset e mbledhjeve të Këshillit Evropian në Bruksel, kryesisht për të diskutuar çështje të politikës së migracionit.
Këtë herë, takimi u thirr nga gjermani Friedrich Merz, italiania Giorgia Meloni dhe belgu Bart De Wever – të gjithë figura të krahut të djathtë – si një përpjekje për të arritur konsensus midis udhëheqësve me vizione të ngjashme.
Megjithatë, tetë vende – Spanja, Portugalia, Irlanda, Sllovenia, Malta dhe tre shtete balltike – nuk morën pjesë. Po ashtu mungonte edhe Presidenti i Këshillit Evropian, António Costa, mikpritësi zyrtar i mbledhjes në kështjellën e shekullit të 16-të në Limburg të Belgjikës, i cili zakonisht kryeson mbledhjet e 27 liderëve.
Sipas një diplomati evropian, Spanja – ekonomia e katërt më e madhe e BE-së – ka shprehur pakënaqësinë e saj përmes kontaktit me Romën, duke theksuar se ky lloj takimi largon Bashkimin Evropian nga vendimmarrja kolektive, në vend që ta afrojë me zgjidhjet.
Kryeministri Pedro Sánchez, një nga pak liderët socialistë të mbetur në bllok, nuk merr pjesë as në takimet paraprake të samiteve mbi migracionin. Nga ana tjetër, Meloni bashkëkryeson me homologët e saj danezë dhe holandezë këto mbledhje para samiteve të liderëve.
Meloni theksoi rëndësinë e këtij format në një postim në rrjetin social X, duke shtuar se “grupi i punës” do të takohet përsëri, përfshirë edhe samitin e ardhshëm të liderëve më 19 mars.
Burime nga qeveria italiane deklaruan se Sánchez “nuk ngriti asnjë shqetësim” për mungesën e ftese gjatë bisedës së tij të drejtpërdrejtë me Melonin në Belgjikë këtë të enjte. Letonia gjithashtu nuk mori ftesë.
“Disa nga vendet u vetëftuan, ne nuk e bëmë këtë,” tha një diplomat slloven, duke komentuar mungesat.
Kryeministri irlandez Micheál Martin, pyetur për mungesën e tij, u shpreh: “Është një ditë e gjatë dhe e lodhshme… nuk e shoh domosdoshmërinë për këtë.”
Kryeministri i Portugalisë, Luis Montenegro, nuk mori pjesë pasi qëndroi në atdhe për të menaxhuar situatën e përmbytjeve, sipas një zëdhënësi qeveritar.
Euractiv kontaktoi zëdhënësit e Maltës, Lituanisë dhe Estonisë, por nuk kishte marrë përgjigje deri në momentin e publikimit.
