Kryeministri Edi Rama ka reaguar pas protestës së djeshme të opozitës, ku pati përplasje mes policisë dhe protestuesve.
Në një mesazh të publikuar në platformën X, Rama ka ironizuar kryetarin e Partisë Demokratike, Sali Berisha, duke e krahasuar me ish-udhëheqësin e Zimbabves, Robert Mugabe. Ai ka bërë gjithashtu thirrje që drejtësia të veprojë për policët e plagosur gjatë protestës.
Reagimi i Ramës
“Këto janë bombat artizanale me të cilat janë sulmuar dhe djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabe të Zimbabves – që i shkon mbrapa një tetëdhjetë e kusur vjeçari të damkosur e të lajthitur!
Uroj që drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës!
Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian.”
Protesta e opozitës u shoqërua me tensione dhe përplasje, ndërsa disa efektivë policie mbetën të plagosur.
