Strukturat e Policisë së Tiranës kanë arrestuar dy shtetas të dyshuar për transport të emigrantëve të paligjshëm drejt vendeve të Bashkimit Evropian.
Sipas njoftimit zyrtar, specialistët e Seksionit për Trafiqet e Paligjshme në DVP Tiranë kapën A. M., 24 vjeç, dhe I. V., 22 vjeç, banues në Kukës, në vendin e quajtur “Mbikalimi i Kasharit”. Ata dyshohet se po transportonin me automjet pesë emigrantë, të cilëve u kishin kërkuar 2,700 euro secilit, me premtimin për t’i dërguar në Francë.
Gjatë operacionit u sekuestruan një automjet dhe dy aparate celularë, që do të shërbejnë si prova materiale në hetimin që po zhvillohet nga autoritetet.
Materialet procedurale janë referuar Prokurorisë për veprime të mëtejshme.
Rasti përbën pjesë të përpjekjeve të vazhdueshme të Policisë për goditjen e kontrabandës dhe trafikut të paligjshëm të emigrantëve në vend.
