Autoritetet ruse kanë bërë të ditur se personi i dyshuar për plagosjen e zëvendësshefit të inteligjencës ushtarake ruse (GRU), Vladimir Alekseyev, është arrestuar në Dubai dhe është ekstraduar drejt Rusisë, përcjell DW.
Shërbimi Federal i Sigurisë (FSB) njoftoi të dielën se i dyshuari është një shtetas rus rreth të 60-ave, i identifikuar si Lyubomir Korba. Sipas FSB-së, ai u ndalua nga policia e Emirateve të Bashkuara Arabe dhe më pas u dorëzua autoriteteve ruse.
Agjencia shtetërore ruse e lajmeve TASS raportoi se një person i dytë është arrestuar në Moskë, ndërsa një bashkëpunëtore e dyshuar, një grua, ka arritur të largohet drejt Ukrainës, duke cituar burime nga FSB. Gazeta ruse Kommersant shkroi se dy të dyshuarit pritet të merren në pyetje dhe të akuzohen zyrtarisht në ditët në vijim.
Çfarë dihet për ngjarjen?
Vladimir Alekseyev, 64 vjeç, zëvendësshef i GRU-së, u qëllua disa herë me armë zjarri në një pallat banimi në Moskë të premten. Sipas hetuesve, ai mbeti në gjendje të rëndë shëndetësore dhe iu nënshtrua një ndërhyrjeje kirurgjikale.
Autoritetet kanë hapur një çështje penale për tentativë vrasjeje. Hetimet paraprake tregojnë se autori i sulmit qëlloi disa herë dhe më pas u largua nga vendngjarja.
FSB-ja njoftoi se dy nga të dyshuarit do të merren në pyetje, ndërsa një i tretë dyshohet se ka ikur në Ukrainë.
Reagime dhe akuza
Kremlini ka akuzuar Ukrainën për atentatin ndaj Alekseyev, duke e cilësuar atë si një përpjekje për të sabotuar bisedimet për paqe. Nga ana e saj, Ukraina ka mohuar çdo përfshirje në këtë ngjarje.
Që nga nisja e pushtimit rus të Ukrainës në vitin 2022, inteligjenca ushtarake ukrainase ka deklaruar se ka kryer disa operacione kundër zyrtarëve të lartë rusë. Gjatë vitit të fundit, tre zyrtarë të tjerë rusë të të njëjtit nivel me Alekseyev janë vrarë në Moskë ose në zonat përreth saj.
Alekseyev ka pasur një rol kyç në operacionet e inteligjencës në Ukrainë dhe në Siri, si dhe ka qenë pjesë e negociatave me ish-kreun e Wagner, Yevgeny Prigozhin, gjatë rebelimit të tij të dështuar në vitin 2023. Ai është gjithashtu nën sanksione nga SHBA dhe Bashkimi Evropian për ndërhyrje në zgjedhjet presidenciale amerikane të vitit 2016 dhe për helmimin e ish-agjentit rus Sergei Skripal në Britani në vitin 2018.
Ngjarja ndodhi vetëm një ditë pas përfundimit të dy ditëve bisedime në Abu Dhabi, që synonin t’i japin fund konfliktit gati katërvjeçar në Ukrainë. Delegacionin rus në këto negociata e drejtonte shefi i GRU-së, Admirali Igor Kostyukov.
