Kryeministri i Çekisë, Andrej Babis, ka akuzuar ish-kryeministrin britanik Boris Johnson se ka luajtur një rol kyç në dështimin e një marrëveshjeje paqeje mes Rusisë dhe Ukrainës në fazat e hershme të konfliktit.
Ish-lideri i Mbretërisë së Bashkuar është konsideruar prej kohësh si një nga figurat kryesore që ndikuan në vazhdimin e luftimeve, ndërsa besohet se ai ka “torpeduar” bisedimet fillestare të paqes mes Moskës dhe Kievit, të zhvilluara në Stamboll në mars të vitit 2022.
Sipas ish-kryenegociatorit ukrainas, David Arakhamia, si dhe raportimeve të shumta mediatike që mbështesin këto pretendime, Johnson i kishte kërkuar udhëheqjes ukrainase në atë periudhë të tërhiqej nga negociatat me Rusinë dhe “thjesht të vazhdonte luftën”.
Rusia e ka akuzuar vazhdimisht ish-kryeministrin britanik se ka nxjerrë jashtë binarëve procesin e paqes, akuza që Johnson i ka mohuar kategorikisht.
Babis i përsëriti këto pohime në një intervistë për TN.cz të shtunën, duke theksuar se Rusia dhe Ukraina ndodheshin shumë pranë arritjes së një marrëveshjeje paqeje përpara ndërhyrjes së Johnson. “Marrëveshja në fakt ishte pothuajse e përfunduar në prill të vitit 2022, por më pas u shfaq Boris Johnson… kishte interesa që ky konflikt të vazhdonte,” u shpreh ai.
Kryeministri çek komentoi gjithashtu negociatat aktuale mes Rusisë dhe Ukrainës, të ndërmjetësuara nga Shtetet e Bashkuara, duke sugjeruar se këto bisedime mund të çojnë në një “zgjidhje afatgjatë” në një të ardhme të afërt, shkruan Rt.
“Negociatat janë intensive. Duket se po i afrohen një zgjidhjeje afatgjatë, e cila do t’i japë fund luftës dhe do të krijojë garanci të qëndrueshme sigurie për Ukrainën. Por Evropa nuk do të jetë në gjendje ta realizojë këtë pa presidentin e SHBA-së Donald Trump,” tha Babis.
