Kreu i Partisë së Lirisë, Ilir Meta, ka reaguar ashpër ndaj zhvillimeve politike, duke deklaruar se tezat dhe strategjitë e kryeministrit Edi Rama nuk mund të çojnë në bashkimin e opozitës, por synojnë ta mbajnë atë të përçarë për interesa pushteti.
Në një reagim të gjatë publik, Meta u shpreh se për gati një dekadë Rama ka ushtruar ndikim jo vetëm mbi qeverinë, parlamentin dhe institucionet, por sipas tij edhe mbi opozitën, përmes korruptimit të lidershipit opozitar dhe pazareve politike. Ai theksoi se dobësia dhe mungesa e guximit politik të disa drejtuesve opozitarë kanë ndihmuar kryeministrin të konsolidojë pushtetin.
Duke iu referuar Reformës Territoriale, Meta deklaroi se ajo u miratua pa konsensus, edhe në një periudhë kur mazhoranca nuk i kishte votat e nevojshme, ndërsa opozita e asaj kohe, sipas tij, bojkotoi procesin dhe nuk paraqiti asnjë alternativë konkrete. Ai përmendi edhe raste të ashtuquajtura pazare politike të bëra “nën tavolinë” për interesa elektorale në disa bashki.
Meta shprehu skepticizëm se pjesëmarrja aktuale e opozitës në komisionet parlamentare do të ndikojë realisht në vendimmarrjen e mazhorancës, por theksoi se opozita ka detyrimin moral të paraqesë alternativa për qytetarët, veçanërisht për shkak të, siç u shpreh ai, degradimit të shërbimeve publike në nivel vendor.
Sipas tij, opozitarizmi i vërtetë duhet të bazohet në guximin për t’u përballur me atë që e cilëson “regjim”, si dhe në gjithëpërfshirje demokratike dhe transparente. Meta nënvizoi se pika kyçe e bashkimit të opozitës duhet të jetë ndryshimi i sistemit zgjedhor, për t’u kthyer qytetarëve të drejtën reale për të zgjedhur deputetët e tyre.
Ai kritikoi ashpër vendosjen selektive të “kushteve morale” brenda opozitës, duke e cilësuar këtë si një shërbim të drejtpërdrejtë ndaj Edi Ramës. Meta hodhi poshtë gjithashtu tezën se largimi i Sali Berishës është kusht për largimin e Ramës nga pushteti, duke e quajtur atë absurde, të pamoralshme dhe destruktive.
Në përfundim, kreu i Partisë së Lirisë paralajmëroi se përçarja e opozitës i shërben vetëm mazhorancës dhe se beteja politike aktuale, sipas tij, është një betejë ekzistenciale për Shqipërinë, ku dështimi nuk mund të jetë alternativë.
