Shtetet e Bashkuara kanë ndërprerë kontaktet zyrtare me Kryetarin e Parlamentit të Polonisë, Wlodzimierz Czarzasty, pasi ai kritikoi politikat e Presidentit amerikan Donald Trump dhe refuzoi të mbështeste një iniciativë për nominimin e tij për Çmimin Nobel për Paqe. Vendimi u bë publik të enjten nga Ambasadori i SHBA-së në Varshavë, Tom Rose, i cili e akuzoi Czarzasty-n për fyerje të papranueshme ndaj presidentit amerikan.
Reagimi i ashpër i ambasadorit amerikan thekson balancën delikate me të cilën përballen politikanët e qeverisë polake, një koalicion pro-evropian, ndërsa përpiqen të ruajnë marrëdhënie të forta me aleatin e tyre më të rëndësishëm strategjik. Kjo vjen në një kohë kur administrata Trump po ndjek politika të forta të parimit “Amerika e Para” (America First), të cilat shumë figura të koalicionit qeverisës në Poloni i shohin si problematike për rendin ndërkombëtar dhe bashkëpunimin multilateral.
Polemika u zhvillua publikisht në platformën sociale X dhe shkaktoi reagim edhe nga Kryeministri polak Donald Tusk, i cili kritikoi tonin e ambasadorit amerikan. “Zoti Ambasador Rose, aleatët duhet të respektojnë, jo të ligjërojnë njëri-tjetrin. Të paktën kështu e kuptojmë ne këtu në Poloni partneritetin,” shkroi Tusk.
Debati nxori në pah gjithashtu përçarjet e brendshme politike në Poloni, veçanërisht mes qeverisë së Tuskut dhe opozitës nacionaliste, e cila është dukshëm më pro-Trump dhe më afër lëvizjes MAGA, si dhe Presidentit polak Karol Nawrocki. Zëdhënësi i këtij të fundit, Rafal Leskiewicz, deklaroi për agjencinë shtetërore të lajmeve PAP se “koalicioni aktual qeverisës zgjodhi si kryetar parlamenti një njeri që nuk e kupton rëndësinë dhe peshën e aleancave”.
Czarzasty, udhëheqës i partisë “E Majta”, partneri më i vogël në koalicionin qeverisës, deklaroi të hënën se nuk do të mbështeste një iniciativë të propozuar nga Kryetari i Dhomës së Përfaqësuesve të SHBA-së, Mike Johnson, dhe Kryetari i Knesset-it izraelit, Amir Ohana. Nisma synonte mbledhjen e krerëve të parlamenteve për të nominuar Donald Trump për Çmimin Nobel për Paqe në vitin 2026, për shkak të rolit të tij të pretenduar në përpjekjet për paqe në Lindjen e Mesme.
Duke shpjeguar qëndrimin e tij, Czarzasty tha se, sipas tij, Trump po “destabilizon” organizatat dhe marrëdhëniet ndërkombëtare. “Presidenti Trump po përfaqëson politikën e forcës dhe po përdor presionin për të ndjekur një politikë transaksionale,” u tha ai gazetarëve. “Për këtë arsye, unë nuk do ta mbështes nominimin e tij për Çmimin Nobel për Paqe, sepse ai nuk e meriton atë.”
Në reagim, Ambasadori Tom Rose deklaroi të enjten se Uashingtoni nuk do të ketë më “asnjë marrëdhënie, kontakt apo komunikim” me Czarzasty-n, me efekt të menjëhershëm. Në një postim në rrjetet sociale, ai shkroi se “fyerjet e tij të paprecedenta dhe të paprovokuara ndaj Presidentit Trump e kanë bërë atë një pengesë serioze për marrëdhëniet tona të shkëlqyera me Kryeministrin Tusk dhe qeverinë e tij”. Rose shtoi se SHBA-ja nuk do të lejonte askënd të dëmtonte marrëdhëniet mes dy vendeve apo të tregonte mungesë respekti ndaj Trump-it, “i cili ka bërë aq shumë për Poloninë dhe popullin polak”.
Si përgjigje, Czarzasty shkroi në platformën X se i vinte keq për reagimin e ambasadorit amerikan, por theksoi se nuk do të tërhiqej nga qëndrimet e tij për çështje themelore, shkruan Reuters.
