Partia konservatore e Kancelarit gjerman Friedrich Merz po diskuton mundësinë e ndalimit të përdorimit të rrjeteve sociale për të rinjtë nën 16 vjeç. Megjithatë, disa partnerë të koalicionit të qendrës së majtë kanë shfaqur rezervë ndaj një ndalimi të plotë.
Që nga viti i kaluar, kur Australia u bë vendi i parë që vendosi një kufi moshe për rrjetet sociale, disa shtete evropiane kanë marrë ose konsideruar masa të ngjashme, për shkak të shqetësimeve mbi ndikimin e tyre negativ te të rinjtë.
Dennis Radtke, kreu i krahut të punës në CDU, theksoi se zhvillimet në rrjetet sociale po tejkalojnë aftësinë e edukimit medial dhe përmendi se shumë platforma janë një “grumbullim urrejtjeje dhe lajmesh të rreme”. Ai përshëndeti idenë e Australisë për vendosjen e një kufiri moshe.
Nga ana tjetër, Johannes Schätzl, zëdhënës për politikën digjitale i Social Demokratëve (SPD), partner i koalicionit, kundërshton ndalimin e plotë dhe propozon kontrolle më efektive nga vetë platformat. Ai theksoi se rrjetet sociale ofrojnë gjithashtu mundësi pjesëmarrjeje dhe formimi opinioni dhe se platformat duhet të rregullojnë modelet e tyre të biznesit për të mbrojtur të rinjtë, duke shmangur sisteme algoritmike agresive.
Një mocion nga dega e CDU-së në Schleswig-Holstein propozon vendosjen e moshës minimale 16 vjeç për platformat sociale me verifikim të detyrueshëm. Mocioni përmend TikTok, Instagram dhe Facebook si platforma të mundshme për kufizime. Sekretari i Përgjithshëm i CDU-së, Carsten Linnemann, mbështeti idenë, duke theksuar se fëmijët duhet të mbrohen nga urrejtja, dhuna, krimi dhe dezinformimi edhe në botën digjitale, shkruan Reuters.
Debatet mbi ndikimin e rrjeteve sociale te fëmijët kanë shtuar shqetësimet në Gjermani, ku qeveria krijoi një komision të posaçëm për mbrojtjen e të rinjve online. Raporti i këtij komisioni pritet të publikohet më vonë gjatë vitit.
Thorsten Schmiege, kreu i trupës së rregullatorëve të medias në nivel shtetëror, tha për Reuters se çështje si kiber-bullizmi, ngacmimi seksual online dhe gjuhë urrejtjeje trajtohen shumë seriozisht dhe se platformat duhet të ndërmarrin veprime. Ai shtoi se, nëse masat vullnetare nuk mjaftojnë, ndalimi përfundimtar mund të konsiderohet si opsion i fundit.
