Zyrtarë iranianë dhe amerikanë konfirmuan të mërkurën se një takim mes përfaqësuesve të dy vendeve do të zhvillohet të premten në Muskat, kryeqytetin e Omanit.
Konfirmimi vjen pas raportimeve se bisedimet rrezikonin të dështonin për shkak të mosmarrëveshjeve lidhur me formatin dhe vendndodhjen e negociatave. Ministri i Jashtëm i Iranit, Abbas Araghchi, njoftoi se takimi për çështjen bërthamore është planifikuar për të premten në Muskat, duke falënderuar autoritetet e Omanit për ndërmjetësimin dhe organizimin e takimit.
Edhe Shtëpia e Bardhë konfirmoi për DW se bisedimet do të mbahen në Oman, ndonëse më herët ishte përmendur mundësia që ato të zhvilloheshin në Turqi.
Megjithatë, mbeten të paqarta pikat e përbashkëta mbi agjendën e negociatave. Irani ka këmbëngulur që bisedimet të kufizohen vetëm në çështjen e programit të tij bërthamor, ndërsa Shtetet e Bashkuara kanë sinjalizuar se kërkojnë një diskutim më të gjerë. Sekretari amerikan i Shtetit, Marco Rubio, deklaroi se çdo takim duhet të përfshijë gjithashtu programin raketor balistik të Iranit, mbështetjen për grupet e armatosura në Lindjen e Mesme dhe çështjet e të drejtave të njeriut.
Nga ana tjetër, zyrtarë të lartë iranianë kanë bërë të ditur se programi raketor nuk është pjesë e negociatave dhe se insistimi i SHBA-së për tema jashtë çështjes bërthamore mund të rrezikojë zhvillimin e bisedimeve.
Ndërkohë, presidenti amerikan Donald Trump ka vijuar retorikën e ashpër ndaj Iranit, duke deklaruar se Teherani po planifikonte ndërtimin e një objekti të ri bërthamor dhe duke paralajmëruar pasoja në rast të përshkallëzimit të situatës. Trump ka rritur gjithashtu praninë ushtarake amerikane në rajon dhe nuk ka përjashtuar mundësinë e veprimeve të reja ushtarake.
