Policia ka zbuluar një subjekt në lagjen “10 Korriku” në Berat, i cili shiste ora dore të kontrabanduara dhe imitime markash të ndryshme, pa lëshuar kuponë tatimor dhe pa fatura blerjeje.
Gjatë kontrollit janë sekuestruar 191 ora dore, të cilat shiteshin edhe online. Pronari i biznesit është proceduar penalisht për ushtrim të veprimtarisë në informalitet dhe tregtim të produkteve të kontrabanduara.
Njoftimi:
“Berat
Zbulohet një subjekt në lagjen “10 korriku”, që shiste pa kuponë tatimor, edhe online, ora dore të kontrabanduara, imitime të markave të ndryshme.
Procedohet penalisht pronari i subjektit.
Sekuestrohen 191 ora dore.
Si rezultat i kontrolleve në subjekte në të gjithë territorin e qarkut, me objektiv konstatimin e rasteve të ushtrimit të veprimtarive ekonomike, në informalitet dhe/ose me produkte të kontrabanduara, specialistët e Sektorit për Hetimin e Krimeve Ekonomike dhe Financiare zbuluan një subjekt në lagjen “10 korriku”, në këto paligjshmëri.
Për rastin u referuan materialet në Prokurori, ku nisi procedimi penal për shtetasin A. D., 39 vjeç.
Nga kontrolli në subjektin e tij, u gjetën 191 ora dore, imitime të markave të ndryshme, të dyshuara të kontrabanduara, të cilat shiteshin edhe online.
Shtetasi nuk kishte fatura blerjeje për mallrat dhe as nuk lëshonte kuponë tatimor kur i shiste.
Kontrollet kundër paligjshmërive në fushën ekonomike, vijojnë.
Materialet procedurale iu referuan Prokurorisë së Beratit, për veprime të mëtejshme”, thuhet në njoftimin e policisë.
