Rreth 200 persona janë vrarë nga persona të armatosur në sulme të ndara ndaj fshatrave të largëta në Nigerinë qendrore dhe veriore, bënë të ditur të mërkurën një ligjvënës lokal, banorë dhe policia. Ndërkohë, forcat e sigurisë kanë nisur operacione për të kërkuar të mbijetuar dhe për të ndjekur autorët e sulmeve.
Në shtetin qendror të Kwaras, persona të armatosur sulmuan të martën komunitetin Woro, duke lënë pas të paktën 170 persona të vdekur, deklaroi përmes telefonit ligjvënësi i zonës, Saidu Baba Ahmed. Ky konsiderohet sulmi më vdekjeprurës i regjistruar këtë vit në këtë distrikt, i cili kufizohet me shtetin Niger, një zonë që kohët e fundit është shndërruar gjithnjë e më shumë në shënjestër të grupeve të armatosura që bastisin fshatrat, rrëmbejnë banorët dhe plaçkitin bagëtinë.
Sipas Ahmedit, sulmuesit i grumbulluan banorët e fshatit, ua lidhën duart pas shpine dhe i ekzekutuan. Ligjvënësi ndau me agjencinë Reuters fotografi të trupave të pajetë, megjithëse agjencia tha se nuk ishte në gjendje t’i verifikonte menjëherë këto pamje. Ai shtoi se gjatë sulmit shumë banorë u larguan dhe u fshehën në shkurret përreth fshatit, ndërsa personat e armatosur u vunë flakën shtëpive dhe dyqaneve. Policia konfirmoi se “shumë njerëz u vranë”, por nuk dha një shifër të saktë të viktimave.
“Ndërsa po flas me ju tani, jam në fshat së bashku me personelin ushtarak, duke u marrë me trupat e pajetë dhe duke kontrolluar zonat përreth për të tjerë,” tha Ahmed. Ai shtoi se disa persona rezultonin ende të zhdukur të mërkurën në mëngjes.
Banorët i thanë Reuters-it se sulmuesit, të cilët dyshohet se ishin xhihadistë që më parë predikonin në fshat, kërkuan që vendasit të hiqnin dorë nga besnikëria ndaj shtetit nigerian dhe të kalonin nën ligjin islamik të Sheriatit. Kur fshatarët kundërshtuan, militantët hapën zjarr. Zëdhënësja e policisë së Kwaras, Adetoun Ejire-Adeyemi, tha se policia dhe ushtria ishin mobilizuar në zonë për një operacion kërkim-shpëtimi, por refuzoi të jepte detaje mbi numrin e viktimave.
Sulmi në Katsina
Në një sulm të veçantë në shtetin verior Katsina, persona të armatosur vranë të paktën 21 persona, duke lëvizur nga shtëpia në shtëpi dhe duke qëlluar viktimat e tyre, sipas banorëve dhe policisë lokale. Ky sulm i dha fund një pakti paqeje gjashtëmujor midis komunitetit lokal dhe një bande të armatosur.
Ngjarja nxori në pah dilemën me të cilën përballen banorët e veriut të largët të Nigerisë, ku disa komunitete kanë kërkuar marrëveshje paqeje me bandat e armatosura që i terrorizojnë. Banorët zakonisht mbledhin para dhe ushqime, të cilat ua dorëzojnë banditëve me shpresën se kështu do të shmangin sulmet, shkruan Reuters.
Nigeria është nën presion të shtuar për të rivendosur sigurinë që kur Presidenti i Shteteve të Bashkuara, Donald Trump, e akuzoi vitin e kaluar se nuk ka mbrojtur të krishterët, pas një vale sulmesh islamike dhe rrëmbimesh masive. Forcat amerikane goditën atë që i përshkruan si objektiva terroristë më 25 dhjetor.
Autoritetet nigeriane kanë deklaruar se po bashkëpunojnë me Uashingtonin për të përmirësuar situatën e sigurisë dhe kanë mohuar akuzat për persekutim sistematik të të krishterëve në vend.
