Një spital në Barcelonë njoftoi të hënën se ka kryer një transplant pionier të fytyrës në të cilin dhuruesja, për herë të parë në botë, kishte ofruar fytyrën e saj për dhurim përpara se t’i nënshtrohej procedurës së vdekjes së asistuar.
Operacioni kompleks përfshinte transplantimin e indeve të përbëra nga pjesa qendrore e fytyrës dhe kërkoi pjesëmarrjen e rreth 100 profesionistëve, duke përfshirë psikiatër dhe imunologë, tha në një deklaratë spitali prestigjioz Vall d’Hebron.
Koordinatorja e transplanteve të spitalit, Elisabeth Navas, tha se dhuruesja kishte treguar “një nivel pjekurie që të lë pa fjalë”. “Dikush që ka vendosur t’i japë fund jetës së vet, ia kushton një nga dëshirat e tij të fundit një të huaji dhe i jep atij një shans të dytë të kësaj magnitude,” tha Navas.
Kjo ngjarje shënon një pikë kthese si në mjekësinë kirurgjikale, ashtu edhe në etikën mjekësore, për shkak të ndërthurjes së transplantit me eutanazinë, shkruan Reuters.
Lider global në transplantimin e organeve
Marrësja – e identifikuar vetëm me emrin e saj, Carme – kishte pësuar nekrozë të indeve të fytyrës nga një infeksion bakterial i shkaktuar nga një pickim insekti, gjë që i kishte prekur aftësinë për të folur, ngrënë dhe parë.
“Kur shihem në pasqyrë në shtëpi, mendoj se po filloj të dukem më shumë si vetvetja,” tha Carme në një konferencë për shtyp të hënën, duke shtuar se shërimi i saj po shkonte shumë mirë. Për raste të tilla që kërkojnë transplantim të fytyrës, dhuruesi dhe marrësi duhet të kenë të njëjtën gjini, grup gjaku dhe të kenë përmasa të ngjashme të kokës.
Me një popullsi prej 49.4 milionë banorësh, Spanja ka qenë lidere globale në transplantimin e organeve për më shumë se tri dekada. Në vitin 2021, ajo u bë vendi i katërt i Bashkimit Evropian që legalizoi eutanazinë. Gjysma e gjashtë transplanteve të fytyrës që janë bërë ndonjëherë në Spanjë janë kryer nga stafi i Vall d’Hebron.
Spitali katalanas kreu gjithashtu transplantin e parë të plotë të fytyrës në botë në vitin 2010. Një zëdhënës i spitalit refuzoi të tregonte datën e saktë të ndërhyrjes për arsye privatësie, por i tha Reuters se ajo ndodhi gjatë vjeshtës së vitit 2025.
Rreth 6,300 transplantime organesh u kryen vitin e kaluar në Spanjë, sipas të dhënave të Ministrisë së Shëndetësisë, ku transplantet e veshkave ishin më të zakonshmet. Të dhënat qeveritare tregojnë se në vitin 2024, 426 persona morën asistencë për vdekjen.
