Sekretari i Përgjithshëm i Kombeve të Bashkuara, Antonio Guterres, ka paralajmëruar se organizata mund të përballet me një “kolaps të menjëhershëm financiar”, për shkak të detyrimeve të papaguara dhe një rregulle buxhetore që kërkon kthimin e mjeteve të papërdorura, sipas një letre të parë nga Reuters.
Guterres theksoi se kriza po thellohet, duke kërcënuar realizimin e programeve dhe duke rrezikuar financat e OKB-së, përcjell Reuters.
Ai paralajmëroi se situata mund të përkeqësohet ndjeshëm në muajt në vijim, duke shtuar se, sipas rregullave aktuale, organizata detyrohet të kthejë qindra miliona dollarë kontribuimesh të papërdorura, gjë që e vendos në një “cikël kafkëeske”.
Në fund të vitit 2025, detyrimet e papaguara përfshinin një rekord prej 1.57 miliardë dollarësh. Guterres kërkoi që të gjithë shtetet anëtare të respektojnë obligimet e tyre ose të reformojnë thelbësisht rregullat financiare të OKB-së për të shmangur kolapsin.
Kriza vjen ndërsa Shtetet e Bashkuara, kontribuesi më i madh i OKB-së me 22% të buxhetit bazë, kanë ulur financimin vullnetar dhe kanë refuzuar të bëjnë pagesat e detyrueshme për buxhetin e rregullt dhe operacionet e paqeruajtjes.
Guterres gjithashtu ka nisur një forcë pune për reformimin e OKB-së, e njohur si UN80, me qëllim reduktimin e kostove dhe rritjen e efikasitetit.
Ai paralajmëroi se, pa veprime të menjëhershme, OKB-ja mund të mbetet pa para që nga korriku i këtij viti.
