Ministri i Jashtëm i Danimarkës, Lars Løkke Rasmussen, deklaroi të mërkurën se bisedimet me zyrtarët amerikanë në Shtëpinë e Bardhë nuk sollën asnjë ndryshim në qëndrimin e Shteteve të Bashkuara lidhur me Groenlandën, duke pranuar se Uashingtoni mbetet i palëkundur në interesin e tij për territorin autonom danez.
Në një konferencë për shtyp pas takimit, Rasmussen theksoi se çdo ide që cenon integritetin territorial të Mbretërisë së Danimarkës dhe të drejtën e vetëvendosjes së popullit Groenlandez është plotësisht e papranueshme për Kopenhagën. Ai nënvizoi se pala daneze e bëri shumë të qartë se pretendimet amerikane nuk janë në interesin e mbretërisë, por shtoi se nuk arritën të bindin administratën amerikane të ndryshojë qëndrim.
Sipas Rasmussen, është e qartë se presidenti amerikan Donald Trump vazhdon të shfaqë dëshirë për të marrë kontrollin e Groenlandës. Megjithatë, ai bëri të ditur se Danimarka dhe Shtetet e Bashkuara kanë rënë dakord të krijojnë një grup pune të nivelit të lartë, i cili do të merret me adresimin e shqetësimeve të sigurisë së SHBA-së, duke respektuar njëkohësisht vijat e kuqe të vendosura nga Kopenhaga.
Takimi në Uashington u zhvillua mes zëvendëspresidentit amerikan JD Vance, Sekretarit të Shtetit Marco Rubio, ministrit danez të Jashtëm dhe ministres së Jashtme të Groenlandës, Vivian Motzfeldt, në një kohë kur interesimi i presidentit Trump për blerjen e territorit autonom është rikthyer në qendër të vëmendjes, shkruan Anadolu Agency.
Më herët gjatë ditës, Trump deklaroi se Shtetet e Bashkuara kanë nevojë për Groenlandën për arsye të Sigurisë Kombëtare, duke e cilësuar atë si thelbësore për projektin e mbrojtjes të njohur si “Kupola e Artë”, që sipas tij po ndërtohet aktualisht.
Groenlanda, e cila gëzon vetëqeverisje brenda Mbretërisë së Danimarkës, konsiderohet strategjikisht e rëndësishme për shkak të pozicionit të saj gjeografik në Arktik, pasurive të mëdha minerale dhe shqetësimeve të lidhura me rritjen e aktivitetit rus dhe kinez në rajon. Pavarësisht interesit amerikan, si Danimarka ashtu edhe Groenlanda kanë refuzuar vazhdimisht çdo ide për shitjen e territorit, duke riafirmuar sovranitetin danez mbi ishullin.
