Presidenti Donald Trump zbuloi të martën një plan për të rafinuar dhe shitur deri në 50 milionë fuçi naftë venezueliane që kishte mbetur në Venezuelë nën bllokadën amerikane, në një shenjë të mëtejshme se Uashingtoni po koordinohet me qeverinë venezueliane që nga kapja e Presidentit Nicolas Maduro.
Maduro është në një burg të Nju Jorkut në pritje të akuzave për drogë pas bastisjes së së shtunës në mëngjes, ku SHBA-të vlerësojnë se vranë rreth 75 persona, sipas një raporti të Washington Post që citon zyrtarë të njohur me çështjen.
SHBA-të ende nuk kanë raportuar një numër të të vdekurve nga një operacion që riafirmoi gatishmërinë e SHBA-së për të ndërhyrë në Amerikën Latine, ndoshta me operacionin e saj më dramatik ushtarak që nga pushtimi i Panamasë në vitin 1989, ku u kap udhëheqësi panamez Manuel Noriega.
Karakasi nuk ka dhënë një numër të caktuar për të vrarët, por ushtria publikoi një listë me 23 emra të të vdekurve të saj. Zyrtarët venezuelianë kanë thënë se një pjesë e madhe e kontingjentit të sigurisë së Maduros u vra “me gjakftohtësi” dhe Kuba ka thënë se 32 anëtarë të shërbimeve të saj ushtarake dhe të inteligjencës në Venezuelë u vranë. Presidentja e përkohshme e Venezuelës, Delcy Rodriguez, shpalli të martën një javë zie për anëtarët e ushtrisë të vrarë në bastisje, shkruan Reuters.
Operacioni u dënua nga Rusia, Kina dhe aleatët e majtë të Venezuelës, ndërsa aleatët e Shteteve të Bashkuara kanë kërkuar respektimin e ligjit ndërkombëtar.
Maduro, 63 vjeç, u deklarua i pafajshëm të hënën për akuzat për narkotikë. Ai tha se ishte një “njeri i mirë” dhe ende president i Venezuelës, ndërsa qëndronte në një gjykatë në Manhattan i prangosur në kyçet e këmbëve dhe i veshur me uniformë burgu portokalli dhe bezhë .
SHBA-të do të marrin naftën venezueliane
Ndërsa e ardhmja politike e Venezuelës mbetet e pasigurt mes pretendimeve të SHBA-së se ajo do të drejtojë vendin e Amerikës së Jugut, për momentin Trump duket se po punon me Rodriguez dhe zyrtarë të tjerë të lartë nga qeveria e Maduros, duke zhgënjyer opozitën që shpresonte të luante një rol më të madh.
Trump njoftoi në rrjetet sociale se Venezuela do të shiste 30 deri në 50 milionë fuçi naftë të sanksionuar që do të dërgoheshin direkt në Shtetet e Bashkuara sipas një plani që do të ekzekutohej menjëherë nga Sekretari i Energjisë Chris Wright.
“Kjo naftë do të shitet me çmimin e saj të tregut dhe ato para do të kontrollohen nga unë, si President i Shteteve të Bashkuara të Amerikës, për të siguruar që përdoren në dobi të popullit të Venezuelës dhe Shteteve të Bashkuara!” tha Trump. Bazuar në çmimet e fundit për naftën venezueliane, marrëveshja mund të jetë me vlerë deri në 1.9 miliardë dollarë.
Zyrtarët amerikanë ende nuk kanë përcaktuar një kornizë ligjore për sekuestrimin e naftës venezueliane, megjithëse SHBA-të kanë akuzuar anijet cisternë venezueliane për shkelje të sanksioneve të SHBA-së për të transportuar naftë iraniane dhe venezueliane.
