Kryeministri izraelit Benjamin Netanyahu paralajmëroi të hënën se Irani do të përballet me “pasoja shumë të rënda” nëse sulmon Izraelin, duke theksuar koordinimin e ngushtë me Presidentin amerikan Donald Trump mbi politikën ndaj Iranit dhe çështjet më të gjera rajonale.
Deklarata u bë gjatë një debati të veçantë në Knesset, ku ishin të pranishëm edhe liderët e opozitës, përcjell Ynet.
Netanyahu tha se Izraeli dhe Trump janë kryesisht të një mendjeje për Iranin dhe çështje të tjera rajonale, pas takimit të tyre në rezidencën e Trump në Mar-a-Lago, Florida.
“Për Iranin, i cili tërheq fijet e terrorit në gjithë Lindjen e Mesme dhe më gjerë, Presidenti Trump dhe unë shprehim një pozicion të fortë,” deklaroi Netanyahu.
“Ne nuk do t’i lejojmë Iranit të rindërtojë industrinë e raketave balistike dhe sigurisht jo të rinisë programin bërthamor që ne e goditëm rëndë.”
Ai shtoi se pozicioni i Izraelit mbetet i pandryshuar: zero kapacitete pasurimi, heqja e të gjithë uranit të pasuruar nga Irani dhe mbikëqyrje strikte dhe e vazhdueshme e objekteve bërthamore.
Netanyahu gjithashtu bëri thirrje për mbështetje të protestave kundër klerikëve iranianë dhe tha se Izraeli “identifikohet me luftën e popullit iranian për liri dhe drejtësi.”
Komenti i tij u bë ndërsa Reuters raporton se zyrtarët iranianë po shqetësohen gjithnjë e më shumë se Izraeli mund të kryejë një sulm të ri, për shkak të protestave anti-qeveritare dhe presionit të jashtëm, duke i ngushtuar hapësirën e manovrës Teheranit.
Netanyahu gjithashtu ripërsëriti mbështetjen për veprimet e fundit të SHBA ndaj presidentit të Venezuelës, duke i konsideruar si pjesë të një përpjekjeje më të gjerë nga vendet që mbështesin “lirinë dhe progresin” kundër regjimeve të dhunshme.
Ky zhvillim vjen ndërsa Iran po përballet me protestat më të mëdha që nga viti 2022, kur ndodhi vdekja e Mahsa Aminit, dhe pas goditjeve izraelito-amerikane të vitit të kaluar ndaj komandantëve të Gardës Revolucionare dhe objekteve bërthamore, që kanë lënë Teheranin të shqetësuar për sigurinë e tij.
Situata ndërkombëtare mbetet e tensionuar, ndërkohë që SHBA dhe Izraeli paralajmërojnë se do të ndërmarrin veprime ushtarake nëse Iran përpiqet të zhvillojë armë bërthamore, ndërsa populli iranian vazhdon të protestojë kundër krizës ekonomike dhe sundimit klerikal.
