Tatiana Schlossberg, gazetare mjedisore dhe mbesa e ish-presidentit amerikan John F. Kennedy, ka ndërruar jetë në moshën 35-vjeçare, pas një beteje me leukeminë akute mieloide, përcjell Euronews.
Lajmi u bë i ditur nga Fondacioni i Bibliotekës John F. Kennedy përmes një postimi në Instagram: “E bukura jonë Tatiana ndërroi jetë këtë mëngjes. Ajo gjithmonë do të mbetet në zemrat tona.” Postimi nuk përmend vendin apo shkakun e vdekjes.
Schlossberg, vajza e Caroline Kennedy dhe Edwin Schlossberg, kishte zbuluar në një ese për The New Yorker në nëntor 2025 se vuante nga kanceri terminal. Ajo u diagnostikua me leukemi akute mieloide në maj 2024, një formë e rrallë që zakonisht shfaqet tek të moshuarit. Zbulimi u bë pas lindjes së fëmijës së saj të dytë, kur mjeku vuri re një nivel të lartë të qelizave të bardha të gjakut.
Në esenë e saj të titulluar “A Battle With My Blood”, Schlossberg tregoi se kishte kaluar rreth me kimioterapi, dy transplante të qelizave burimore dhe kishte marrë pjesë në prova klinike. Ajo shkroi se gjatë provës më të fundit, mjeku i kishte thënë se mund ta mbante gjallë për një vit, maksimumi.
Schlossberg gjithashtu kritikoi disa politika të mbështetura nga kushëriri i saj, Robert F. Kennedy Jr., Sekretar i Shëndetësisë dhe Shërbimeve Njerëzore, duke thënë se ato mund të dëmtonin pacientë me kancer si ajo. Në këtë kontekst, e ëma, Caroline Kennedy, kishte nxitur senatorët të refuzonin konfirmimin e tij.
Tatiana Schlossberg ishte e njohur për angazhimin e saj në gazetarinë mjedisore dhe për punën e saj në sensibilizimin ndaj çështjeve të mjedisit dhe shëndetit publik.
