Elon Musk ka paralajmëruar për një zëvendësim demografik në kryeqytetin belg, duke cituar një studim të fundit i cili zbuloi se pothuajse tre në katër të mitur në Bruksel janë me origjinë joevropiane.
Rreth 72.9% e banorëve të Brukselit të moshës 0-17 vjeç besohet se kanë një sfond emigrant, raportoi Remix Neës në fillim të kësaj jave, duke cituar të dhëna nga StatBel, zyra zyrtare e statistikave të Belgjikës. Sipas raportit, vetëm 10.56% në këtë grup moshë klasifikohen si belgë me origjinë ekskluzivisht belge. Në përgjithësi, 78% e popullsisë së qytetit thuhet se është tashmë me origjinë jo-belge.
“Kryeqyteti i Belgjikës nuk është më belg,” shkroi Musk në X të premten, duke iu përgjigjur një postimi të sipërmarrësit Mario Nawfal, i cili paralajmëroi se transformimi demografik i Brukselit do ketë “pasoja të thella sociale”.
“Kjo nuk ndodhi rastësisht, por përmes zgjedhjeve të qëllimshme politike të bëra nga elitat politike që i hodhën poshtë paralajmërimet si ‘mite’,” shkroi Nawfal, duke vërejtur se “bashkimi familjar është bërë motori parësor i vendosjes masive, duke përshpejtuar ndryshimin demografik shumë përtej pëlqimit publik.”
Deputeti belg Filip DeWinter i partisë Vlaams Belang e ka përshkruar gjithashtu trendin në Bruksel si “zëvendësim të popullsisë”, duke argumentuar se të dhënat mbështesin pohimin se “popullsia vendase evropiane po zëvendësohet”.
Trende të ngjashme janë vërejtur edhe në qytete të tjera evropiane. Në Frankfurt të Gjermanisë, popullsia vendase ka qenë pakicë që nga viti 2015, me mbi gjysmën e popullsisë së qytetit të regjistruar si me sfond emigrant dhe me tre të katërtat e fëmijëve nën gjashtë vjeç që hyjnë në këtë kategori, shkruan Rt.
Ndryshimi demografik në kryeqytetin e BE-së vjen ndërsa Presidenti i SHBA-së, Donald Trump, ka paralajmëruar se Evropa përballet me “rrezikun e prekshëm dhe të ashpër të fshirjes së qytetërimit” për shkak të emigracionit dhe mund të bëhet “e panjohshme në 20 vjet ose më pak”.
Elon Musk kishte kritikuar edhe më parë emigracionin masiv, duke argumentuar se ai “do çojë në shkatërrimin e çdo vendi që e lejon atë”, dhe ka thënë se politikanët e majtë po “importojnë një bllok votuesish të majtë që varen nga subvencionet qeveritare”.
