Presidenti i SHBA-së, Donald Trump, njoftoi të dielën se po emëron Guvernatorin e Luizianës, Jeff Landry, si të dërguar special për Groenlandën.
“Jeff e kupton se sa thelbësore është Groenlanda për Sigurinë tonë Kombëtare dhe do çojë përpara fuqishëm interesat e vendit tonë për sigurinë, mbrojtjen dhe mbijetesën e aleatëve tanë, dhe në fakt, të botës,” shkroi Trump në një postim në Truth Social.
Landry, i cili mori detyrën si guvernator i Luizianës në janar 2024, falënderoi Trump-in në X, duke thënë: “Është nder të shërbej në këtë pozicion vullnetar për ta bërë Groenlandën pjesë të SHBA-së. Kjo në asnjë mënyrë nuk ndikon në pozicionin tim si Guvernator i Luizianës!”
Trump ka thënë disa herë gjatë viteve se Groenlanda, një territor danez që kryesisht vetëqeveriset, duhet të bëhet pjesë e Shteteve të Bashkuara, duke cituar arsye sigurie dhe interesin për burimet minerale të ishullit. Landry e mbështeti këtë ide në fillim të këtij viti.
“Presidenti Donald J. Trump ka plotësisht të drejtë!” shkroi Landry në një postim në X më 9 janar.
“Duhet të sigurohemi që Groenlanda t’i bashkohet Shteteve të Bashkuara. SHKËLQYESHËM për ta, SHKËLQYESHËM për ne! Le ta bëjmë realitet!”
Grenlanda dhe Danimarka e kanë kundërshtuar vazhdimisht këtë ide, shkruan Reuters.
