Nëse Gjermania do të mund të zgjidhte lirshëm një mësuese të kualifikuar nga jashtë vendit, ajo do të ishte dikush si Inge Pizarro Krause. 33-vjeçarja nga Kili ka studiuar për tetë vite dhe ka dy vite përvojë mësimdhënieje në qytetin Viña del Mar. Sot, ajo po përgatitet të kontribuojë në zbutjen e mungesës së thellë të mësuesve në Gjermani, përcjell DW.
Që prej gushtit, Pizarro Krause është pjesë e programit special Lehrkräfte PLUS, ku po studion gjuhën gjermane, didaktikë dhe pedagogji, ndërsa ka përjetuar edhe orët e para të mësimdhënies në një shkollë profesionale gjermane.
“Kur erdha në Gjermani, ndjeva sikur duhej të nisja gjithçka nga e para, gjë që është shumë zhgënjyese,” shprehet ajo për DW. “Ke studiuar, ke punuar si mësuese dhe dëshiron të fillosh menjëherë, por përballesh me barriera të shumta burokratike. Ky program ishte pikërisht ajo që më duhej.”
Një zgjidhje ndaj mungesës së mësuesve
Në vetëm 12 muaj, Pizarro Krause dhe 23 pjesëmarrës të tjerë nga Bosnja, Kirgistani dhe Ukraina trajnohen me ritëm të përshpejtuar dhe përfitojnë përvojë praktike për të qenë gati të japin mësim në shkollat gjermane. Programi ofrohet në pesë universitete në landin Nordrhein-Westfalen dhe është një përpjekje konkrete për t’iu përgjigjur krizës së mësuesve, e cila po thellohet në të gjithë vendin.
Sipas të dhënave, Gjermanisë i mungojnë dhjetëra mijëra mësues, ndërkohë që shumë emigrantë me përvojë shumëvjeçare në arsim detyrohen të punojnë në profesione të përkohshme.
“Gjermania ka nevojë urgjente për mësues, por pengesat burokratike janë të mëdha. Duhet një sistem që ta përshpejtojë integrimin,” thekson Pizarro Krause.
“Gjermania nuk mund të shpërdorojë këtë potencial”
Programi u nis në vitin 2018 nga Semra Krieg dhe Ariane Elshof në Këln. Fillimisht, pjesëmarrësit vinin kryesisht nga Turqia dhe Siria, ndërsa sot shumica janë nga Ukraina, por ka edhe aplikantë nga Brazili dhe Tanzania.
“Duke parë mungesën e mësuesve, Gjermania nuk mund ta neglizhojë këtë potencial. Këta janë mësues të vërtetë, që e ushtrojnë profesionin me pasion,” shprehet Elshof.
Një studim i Universitetit të Potsdamit tregon se pjesëmarrësit ndihen më të sigurt për të ardhmen, flasin më mirë gjermanisht dhe janë shumë të motivuar për të punuar afatgjatë në sistemin arsimor gjerman. Pothuajse të gjithë do ta rekomandonin programin te emigrantë të tjerë.
Sukses, por me të ardhme të pasigurt
Mesatarisht, më pak se një person në vit e ka braktisur programin. Aktualisht, për ciklin e ardhshëm në gusht 2026 ka mbi 50 aplikime, ndërkohë që afati për aplikim mbyllet më 8 janar 2026. Megjithatë, financimi i programit është i siguruar vetëm deri në fund të vitit 2027.
Historia e suksesit nga Ukraina
Një tjetër shembull është Natalia Zemlianskaia, e cila kishte mbi 20 vite përvojë si mësuese e anglishtes në Odesa. Pas ardhjes në Gjermani në vitin 2022, ajo u përfshi në Lehrkräfte PLUS dhe sot jep mësim në një shkollë profesionale në Bonn, si dhe mëson gjermanisht për nxënës nga Guinea, Siria dhe Turqia.
“Programi kombinon mësimin e gjuhës me praktikën reale në shkollë. Edhe nëse gjermanishtja nuk është perfekte, ti futesh menjëherë në proces,” thotë ajo.
Apeli i saj për politikëbërësit gjermanë është i qartë: njohje më e shpejtë e diplomave të huaja dhe më shumë programe të tilla.
“Nuk jam fillestare, jam një mësuese me përvojë,” përfundon ajo.
