U.S. Central Command po mban të martën një takim me dyer të mbyllura në Doha me përfaqësues nga rreth 45 vende arabe, myslimane dhe perëndimore për të diskutuar krijimin e një force ndërkombëtare stabilizuese në Gaza.
Izraeli nuk është i ftuar dhe nuk po merr pjesë në bisedime.
Takimi fokusohet në strukturën operacionale të forcës së propozuar, duke përfshirë rregullat e angazhimit, pajisjen me armë, zonat e dislokimit, vendet e stërvitjes dhe nivelin e autoritetit në terren, përcjell Ynet
Një pikë kyçe mbetet nëse ndonjë vend është i gatshëm të dërgojë trupa, për shkak të shqetësimeve mbi përplasjet me grupin terrorist Hamas ose ndërveprime aksidentale me forcat izraelite.
Pavarësisht mos-pjesëmarrjes, Izraeli po ndjek me kujdes zhvillimet. Vendndodhja e takimit në Katar shihet në Jeruzalem si një goditje diplomatike, për shkak të kundërshtimit të fortë të Izraelit ndaj përfshirjes së Katarit.
Megjithatë, përjashtimi i Turqisë konsiderohet një sukses diplomatik pjesërisht, pas kundërshtimeve izraelite, megjithëse pjesëmarrja e ardhshme e Ankarasë nuk përjashtohet.
Zyrtarët turq thuhet se po bëjnë presion ndaj vendeve të tjera, si Azerbajxhani, që të mos marrin pjesë, për të rritur mundësinë që të thirren ata vetë.
Disa vende kanë shprehur gatishmërinë për të kontribuar me trupa, përfshirë Indonezinë, ndërsa Italia mund të jetë vendi i vetëm evropian që do të dërgojë forca. Të tjerët pritet të mbështesin misionin përmes financimit ose trajnimit.
Sipas planeve aktuale, forca do të vendoset fillimisht rreth Rafah, brenda një zone të njohur si “linja e verdhë”, një territor ende nën kontrollin izraelit.
Pozicioni shihet si një shfaqje e pranishmërisë, jo si sfidë e drejtpërdrejtë ndaj Hamas.
Hapat e mëtejshëm, përfshirë avancimin në pjesë më të brendshme të Gazës ose marrjen e kontrollit mbi zona nga të cilat Izraeli mund të tërhiqet më vonë, do të realizohen vetëm nëse Izraeli sigurohet që forca ka kapacitete reale ushtarake për t’u përballur me Hamasin.
SHBA-ja dëshiron që një gjeneral amerikan të udhëheqë Forcën Ndërkombëtare të Stabilizimit, me gjeneralin në pension Jasper Jeffries, i cili më parë udhëhoqi komitetin e mbikëqyrjes së armëpushimit në Liban, si kandidatin kryesor.
Takimi i Doha-s është një hap kyç për të formësuar të ardhmen e Gazës dhe për të vendosur parametrat e operimit të forcës ndërkombëtare, ndërsa mbështetësit e projektit shpresojnë që misioni të nisë formalisht që nga janari 2026, duke përfshirë faza stërvitjeje në një vend të tretë të rajonit.
