Besueshmëria globale e Tajvanit është në rrezik dhe parlamenti duhet të tërheqë një sërë ligjesh që qeveria i kundërshton, tha Presidenti Lai Ching-te mes një mosmarrëveshjeje në thellim me opozitën, e cila e ka kritikuar atë për injorimin e vullnetit të popullit.
Ndërsa Lai fitoi zgjedhjet presidenciale vitin e kaluar, Partia e tij Demokratike Progresive (DPP) humbi shumicën parlamentare ndaj Kuomintangut (KMT) dhe aleatit të saj shumë më të vogël, Partisë Popullore të Tajvanit.
Meqenëse DPP kontrollon presidencën, ajo drejton edhe qeverinë në sistemin e Tajvanit, por opozita ka përdorur shumicën e saj parlamentare për të miratuar legjislacionin e vet dhe për të penguar planet e qeverisë.
Ngërçi aktual midis qeverisë dhe opozitës buron nga ndryshimet e miratuara nga opozita muajin e kaluar në një ligj për ndarjen e të ardhurave, i cili u dha më shumë fonde qeverive vendore.
Administrata e Lai thotë se ligji, së bashku me përmbysjen e reformave të pensioneve të miratuara në vitin 2018, janë të paqëndrueshme nga ana fiskale, dhe Kryeministri Cho Jung-tai të hënën tha se po refuzonte të miratonte ligjin për financimin e qeverisjes vendore.
Në një videomesazh të postuar në mediat sociale të hënën vonë, Lai tha se ligjet duhet të tërhiqen dhe përsëriti se ishte i gatshëm të shkonte vetë në parlament dhe të fliste me ligjvënësit, shrkuan Reuters.
“Të dashur bashkëqytetarë, Tajvani është tashmë një qendër kyçe e kampit demokratik global; stabiliteti ynë ndikon në të gjithë botën. Nuk mund të lejojmë që ligjet me të meta të dobësojnë konkurrueshmërinë e Tajvanit dhe nuk duhet ta lejojmë bashkësinë ndërkombëtare të humbasë besimin tek Tajvani”, tha ai.
KMT dhe TPP thonë se qeveria po vepron në mënyrë diktatoriale duke refuzuar të miratojë legjislacionin dhe po shkel mbi sundimin e ligjit duke injoruar vullnetin e parlamentit të zgjedhur në mënyrë demokratike.
Zëdhënësi i KMT-së, Niu Hsu-ting, tha se DPP-ja kishte dështuar tashmë në zgjedhje këtë vit, duke përmendur zgjedhjet e përsëritura gjatë verës kundër një numri ligjvënësish të KMT-së të shtyrë nga grupet qytetare, por të mbështetura nga DPP-ja dhe të cilat nuk hoqën nga detyra asnjë ligjvënës të KMT-së.
“Kur qytetarët e zakonshëm menduan se partia në pushtet më në fund mund të qetësohej dhe t’i kushtonte vëmendje ndjenjës publike, ajo që morën në vend të kësaj ishin më shumë të njëjtat taktika të nivelit të ulët, përhapja e thashethemeve, bërja e akuzave të pabaza dhe përdorimi i shantazhit emocional dhe taktikave përçarëse”, tha ai.
Megjithatë, KMT deri më tani ka shtyrë një votë mosbesimi ndaj kryeministrit, gjë që mund të çojë në rrëzimin e qeverisë dhe ndoshta në zgjedhje të reja parlamentare.
