Kryeministri Edi Rama, gjatë podcastit “Flasim”, ka rrëfyer një episod që sipas tij ka ndodhur në ambientet e Kryeministrisë, ku tre hetues të Byrosë Kombëtare të Hetimit (BKH) kishin refuzuar të dorëzonin armët e zjarrit, në kundërshtim me rregulloren e sigurisë.
Pas kësaj deklarate, BKH ka reaguar zyrtarisht, duke theksuar se në asnjë moment nuk ka pasur debat apo përplasje me Gardën e Republikës.
Sipas reagimit të BKH-së, më 20 nëntor 2025, tre hetues janë paraqitur në ambientet e Këshillit të Ministrave për ekzekutimin e vendimit të Gjykatës së Posaçme të Shkallës së Parë, nr. 118, datë 19.11.2025, i cili parashikonte masën e pezullimit nga detyra ndaj zëvendëskryeministres Belinda Balluku.
Në hyrjen e brendshme të institucionit, hetuesit janë informuar nga Garda se, sipas rregullave në fuqi, nuk lejohet hyrja me armë zjarri në ambientet e brendshme. Njëri prej hetuesve ka kërkuar sqarime mbi mënyrën dhe vendin e depozitimit të armëve, ndërsa Garda i ka orientuar që ato të liheshin në dollapët e posaçëm të sigurisë.
“Pas verifikimit se ambienti i depozitimit ishte i sigurt dhe i monitoruar me kamera, hetuesit kanë depozituar armët dhe kanë vijuar normalisht me kryerjen e veprimeve procedurale”, thuhet në reagimin e BKH-së, duke nënvizuar se nuk ka pasur asnjë përplasje mes palëve.
BKH kujton gjithashtu se e drejta e hetuesve për mbajtjen e armës së zjarrit mbështetet në ligjin nr. 25/2019 “Për organizimin dhe funksionimin e Policisë Gjyqësore”, konkretisht në nenin 31, pika 3.
Ndërkohë, në deklaratën e tij, kryeministri Rama u shpreh kritik ndaj asaj që e quajti një qasje problematike brenda institucioneve të drejtësisë, duke përmendur edhe episodin me hetuesit e BKH-së:
“Nuk do ta ndjek kurresesi logjikën e mbrapshtë të dënimit me indicie, as në këtë rast, po do të mbetem tek bindja se këto dy indicie tejet shqetësuese nuk provojnë se protagonistëve të pavarësisë së drejtësisë u ka marrë koka erë dhe u është mbushur mendja se ata janë shteti, ligji e drejtësia, si puna e ca trimoshave të BKH-së…”, tha Rama, duke bërë thirrje për reflektim serioz dhe ndërinstitucional në kuadër të Reformës në Drejtësi.
