Përplasjet mes Tajlandës dhe Kamboxhias pranë kufirit të kontestuar kanë vijuar me intensitet edhe këtë javë, teksa pritet një telefonatë ndërmjet presidentit të SHBA-së, Donald Trump, dhe liderëve të të dy vendeve, përcjell DW.
Deri më tani, të paktën 19 persona – ushtarë dhe civilë – kanë humbur jetën, ndërsa qindra mijëra banorë nga të dyja anët e kufirit janë zhvendosur.
Kryeministri tajlandez, Anutin Charnvirakul, deklaroi se gjatë bisedës së pritshme me Trump-in do të “shpjegojë dhe sqarojë” situatën në terren. “Ai duhet t’i dëgjojë detajet direkt nga unë, nëse më kontakton,” tha Charnvirakul, duke shtuar se ministri i Jashtëm tashmë po jep informacion në nivel diplomatik.
Kjo është përplasja më e rëndë mes dy vendeve që prej korrikut, kur një luftë pesëditore përfundoi me një armëpushim të ndërmjetësuar nga Trump dhe kryeministri malajzian, Anwar Ibrahim.
