Bashkimi Europian ka vendosur të mbajë të bllokuara për një kohë të pacaktuar asetet e Bankës Qendrore Ruse, një element kyç i huasë për reparacionet ndaj Ukrainës, e cila pritet të diskutohet në një samit vendimtar javën e ardhshme, përcjell Euronews.
Me këtë vendim, BE garanton që fondet nën juridiksionin e saj nuk do t’i kthehen Rusisë, mes frikës se Shtetet e Bashkuara mund të kërkojnë kontrollin e tyre dhe t’i përdorin në një marrëveshje të ardhshme me Moskën për t’i dhënë fund luftës.
Vendimi u mor të enjten nga ambasadorët e vendeve të BE-së, duke u mbështetur në nenin 122 të traktateve të Unionit, i cili lejon marrjen e masave emergjente me shumicë të cilësuar dhe pa nevojën e miratimit nga Parlamenti Europian.
Ligji ndalon kthimin e 210 miliardë eurove në Bankën Qendrore të Rusisë. Pjesa më e madhe e tyre, rreth 185 miliardë euro, ndodhet në Euroclear në Bruksel, ndërsa 25 miliardët e tjerë janë të depozituara në banka private.
Deri tani, fondet ishin të bllokuara nën një regjim sanksionesh që kërkon unanimitet nga të 27 vendet anëtare, duke i bërë ato të cenueshme nga vetot individuale.
Javën e kaluar, Komisioni Europian propozoi përdorimin e nenit 122, duke argumentuar se pushtimi rus i Ukrainës ka shkaktuar një “ndikim të rëndë ekonomik” për të gjithë BE-në, përfshirë “çrregullime të furnizimit, pasiguri të lartë, rritje të riskut financiar, ulje të investimeve dhe të konsumit”, si dhe sulme të shumta hibride në formën e dronëve, sabotimeve dhe fushatave të dezinformimit.
“Parandalimi i transferimit të fondeve drejt Rusisë është i domosdoshëm për të kufizuar dëmin ndaj ekonomisë së Bashkimit,” thuhet në propozimin e Komisionit.
Sipas vendimit, 210 miliardë euro mund të çlirohen vetëm kur veprimet e Rusisë të mos paraqesin më rrezik të konsiderueshëm për ekonominë e BE-së dhe kur Moska të ketë paguar reparacionet ndaj Ukrainës pa pasoja ekonomike për bllokun. Për këtë do të nevojitet një shumicë e re e cilësuar.
Një diplomat i lartë europian, në kushte anonimiteti, tha: “Neni 122 e vendos bllokimin e aseteve në një bazë më të qëndrueshme, që të mos rinovohet çdo gjashtë muaj. Këshilli Europian ka vendosur tashmë që asetet duhet të mbeten të bllokuara derisa Rusia të ketë paguar dëmet e luftës, ndaj mund të thuhet se ky vendim është zbatimi i atij konkluzioni.”
Vendimi vjen në një kohë kur negociatat për huanë e reparacioneve janë mbërthyer në mosmarrëveshje mes vendeve anëtare, ndërsa samiti i javës së ardhshme pritet të jetë vendimtar për të ardhmen e paketës së ndihmës për Ukrainën.
