Presidenti i SHBA-së, Donald Trump, ka kritikuar liderët europianë si “të dobët” dhe ka sugjeruar se Shtetet e Bashkuara mund të reduktojnë mbështetjen për Ukrainën.
Në një intervistë të gjerë për Politico, ai tha se vendet europiane “në dekadencë” kanë dështuar të kontrollojnë migracionin dhe të ndërmarrin veprime vendimtare për të ndalur luftën në Ukrainë kundër Rusisë, duke i akuzuar ata se lejuan Kievin të luftojë “deri sa të dorëzohet”, përcjell BBC.
Trump argumentoi se Rusia ka “epërsinë” dhe u bëri thirrje presidentit ukrainas, Volodymyr Zelensky, që të “luajë sipas rregullave” duke ia dorëzuar territore Moskës.
Në Mbretërinë e Bashkuar, Downing Street hodhi poshtë pretendimin e Trumpit se Europa kishte dështuar të vepronte, duke përmendur udhëheqjen britanike në sanksione dhe duke riafirmuar mbështetjen për procesin e paqes të udhëhequr nga SHBA.
Trump pretendoi se ndarjet ideologjike tani kërcënojnë të prishin aleancat e Uashingtonit.
Kur u pyet nëse liderët që ai i konsideron të dobët mund të mbeten aleatë, ai u përgjigj: “Varet”, duke shtuar: “Mendoj se janë të dobët, por gjithashtu mendoj se duan të jenë aq politikisht korrektë. Mendoj se nuk dinë çfarë të bëjnë.”
Kritika e fundit publike e presidentit ndaj Europës vjen ndërsa ai përpiqet të rrisë presionin ndaj Zelensky-t dhe aleatëve të Kievit për të përfunduar luftën në Ukrainë.
Deklaratat e tij erdhën gjithashtu pas publikimit nga administrata e tij të Strategjisë së re Kombëtare të Sigurisë, një dokument 33-faqesh, i cili paralajmëron për një “fshirje civilizuese” të mundshme të Europës dhe vë në dyshim nëse disa vende mund të mbeten aleatë të besueshëm.
Rusia mirëpriti këtë strategji, e cila nuk e konsideronte Rusinë si kërcënim për SHBA – si “në përputhje të madhe” me vizionin e Moskës.
Ky dokument pasoi retorikën e ngjashme të Trumpit në fjalimin e tij për OKB-në më herët këtë vit, ku ai kritikoi ashpër Europën Perëndimore dhe qasjen e saj ndaj migracionit dhe energjisë së pastër.
