Presidenti i SHBA-së, Donald Trump, ka sinjalizuar shqetësime rreth marrëveshjes së planifikuar prej 72 miliardë dollarësh që do t’i lejonte Netflix-it të blejë studion kinematografike të Warner Brothers dhe rrjetet e njohura të transmetimit të HBO-së.
Duke folur në një event në Uashington DC të dielën, Trump tha se Netflix ka një “pjesë të madhe të tregut” dhe se madhësia e kombinuar e kompanive “mund të jetë problem”.
Marrëveshja u njoftua të premten, pasi dy kompanitë ranë dakord të bashkojnë nën Netflix disa prej franshizave më të njohura të Warner Bros, përfshirë Harry Potter dhe Game of Thrones, duke krijuar një gjigant të ri në industrinë e medias. Ajo ende duhet të miratohet nga autoritetet e konkurrencës, sipas BBC.
Netflix, i themeluar në vitin 1997 si shërbim qiraje DVD-sh me postë, është rritur duke u bërë shërbimi më i madh i abonimeve në botë. Kjo marrëveshje – një nga më të mëdhatë që ka parë industria në vite, do të vuloste pozicionin e tij të parë në treg.
Sipas marrëveshjes, disa prej franshizave globale të argëtimit, përfshirë Looney Tunes, The Matrix dhe The Lord of the Rings, do të transferoheshin në Netflix.
Marrëveshja pritet të finalizohet pasi Warner Bros të ndajë disa segmente të biznesit të saj në gjysmën e dytë të vitit 2026.
Departamenti Amerikan i Drejtësisë, i cili mbikëqyr bashkimet e mëdha korporative, mund të argumentohet se marrëveshja shkel ligjin nëse bizneset e kombinuara kontrollojnë një pjesë të konsiderueshme të tregut të transmetimit video.
Në Qendrën John F. Kennedy në kryeqytet, Trump tha se Netflix ka një “pjesë shumë të madhe të tregut”, e cila “do të rritet shumë” nëse marrëveshja avancon.
Ai shtoi se do të jetë vetë i përfshirë personalisht në vendimin e miratimit ose bllokimit të marrëveshjes, duke nënvizuar disa herë madhësinë e tregut të Netflix-it.
Trump tha gjithashtu se bashkë-CEO i Netflix-it, Ted Sarandos, kishte vizituar së fundmi Zyrën Ovale dhe e vlerësoi për punën që ka bërë.
“Kam shumë respekt për të. Është një person i jashtëzakonshëm,” tha Trump. “Ka bërë një nga punët më të mëdha në historinë e filmit.”
Sarandos ka pranuar më herët se marrëveshja mund t’i ketë habitur investitorët, por tha se ajo e pozicionon Netflix-in për sukses në “dekadat që vijnë”.
Blair Westlake, ish-kryetar i grupeve televizive të Universal Studios, tha për BBC se aspekti kyç i shqyrtimit të konkurrencës është kombinimi i Netflix-it me shërbimin e transmetimit të HBO-së.
Ai shtoi se edhe pse marrëveshja do t’i jepte Netflix-it një pozicion shumë të fortë në transmetimin online, ajo nuk do të dukej dominuese nëse rregullatorët zgjeronin definicionin e tregut përfshirë TV kabllor, transmetimin tradicional dhe YouTube-in.
“Shumë njerëz nuk e kuptojnë se vendi numër një ku shkojnë konsumatorët globalë për të parë përmbajtje është YouTube, me një diferencë shumë të madhe,” tha Westlake.
Ai shtoi se mendon se marrëveshja do të miratohet, por “do të ketë disa kushte që kompanitë do të duhet t’i pranojnë”.
Bill Kovacic, ish-kryetar i Komisionit Federal të Tregtisë, tha se komentet e Trumpit nënkuptojnë se bisedimet rreth shqetësimeve për marrëveshjen “do të kalojnë përmes Shtëpisë së Bardhë”, duke shtuar se kjo mund të sjellë një nivel të paprecedentë kontrolli presidencial mbi një proces që zakonisht konsiderohet teknik.
Netflix mposhti disa rivalë për të arritur marrëveshjen me Warner Bros, përfshirë Comcast dhe Paramount Skydance.
Ky i fundit, i drejtuar nga David Ellison, kishte tentuar më parë të blinte gjithë Warner Bros, përfshirë rrjetet kabllore, por oferta u refuzua.
Babai i Ellison-it, Larry Ellison – një nga miliarderët më të mëdhenj në botë – është aleat i Trumpit.
Ndërkohë, Shoqata e Shkrimtarëve të Amerikës (WGA) kërkoi që bashkimi të bllokohej, duke deklaruar se “kompania më e madhe e transmetimit në botë që gllabëron një nga konkurrentët e saj më të mëdhenj është pikërisht ajo që ligjet antitrust synojnë të parandalojnë.”
Sipas WGA, pasojat do të ishin negative për punonjësit e industrisë dhe konsumatorët, duke përfshirë “humbjen e vendeve të punës, uljen e pagave, rritjen e çmimeve dhe reduktimin e diversitetit të përmbajtjes.”
