Izraeli nuk do të pranojë krijimin e një shteti palestinez, pasi sipas Kryeministrit Benjamin Netanyahu, qëllimi i vërtetë i një entiteti të tillë do të ishte shkatërrimi i “shtetit të vetëm hebre”.
Netanyahu i bëri këto deklarata të dielën në Jerusalem, gjatë një konference të përbashkët për shtyp me kancelarin gjerman, Friedrich Merz. Ndërsa Merz ritheksoi mbështetjen e Gjermanisë për formimin e një shteti palestinez të pavarur, kryeministri izraelit shprehu hapur kundërshtimin e tij, duke argumentuar se një shtet i tillë do të ishte “i përkushtuar ndaj shkatërrimit tonë, në pragun tonë”.
“Ata tashmë kanë pasur një shtet në Gaza, një shtet de facto, dhe ky shtet u përdor si mjet për të tentuar shkatërrimin e shtetit të vetëm hebre,” tha Netanyahu, duke iu referuar Rripit të Gazës, i cili në praktikë qeveriset nga grupi militant palestinez Hamas.
Sipas tij, Izraeli beson se ekziston “një rrugë për të avancuar një paqe më të gjerë me vendet arabe” si dhe për të “ndërtuar një paqe të qëndrueshme me fqinjët tanë palestinezë”, pa qenë e nevojshme krijimi i një shteti palestinez të pavarur.
Netanyahu ka refuzuar në mënyrë të përsëritur zgjidhjen me dy shtete, e cila mbështetet nga Këshilli i Sigurimit i Kombeve të Bashkuara. Ky propozim parashikon formimin e një shteti palestinez brenda kufijve të armëpushimit që ekzistonin para Luftës Gjashtëditore të vitit 1967, me Jerusalemin Lindor si kryeqytetin e tij, shkruan Rt.
Plani fillestar i OKB-së për ndarjen e territorit në vitin 1947 parashikonte krijimin e dy shteteve, një hebre dhe një arab. Megjithatë, një seri konfliktesh dhe luftërash që pasuan i mundësuan Izraelit të marrë kontroll mbi pjesën më të madhe të tokës që ishte destinuar fillimisht për palestinezët.
Në përfundim, Netanyahu theksoi se çështja e okupimit të Bregut Perëndimor – i cili konsiderohet i paligjshëm sipas së drejtës ndërkombëtare – mbetet një temë e hapur për debat, por la të kuptohet se ruajtja e gjendjes aktuale pritet të vazhdojë edhe në të ardhmen e afërt.
