Presidenti i SHBA-së, Donald Trump, deklaroi të mërkurën se faza e dytë e marrëveshjes së armëpushimit në Gaza “po ecën mirë” dhe pritet të ndodhë “shumë shpejt”, vetëm disa orë pasi Hamas theu armëpushimin në Rafah dhe plagosi katër ushtarë izraelitë, përcjell YNetNews.
Duke folur nga Zyra Ovale, Trump tha se “në Lindjen e Mesme ka paqe, edhe pse njerëzit nuk e kuptojnë”, duke shtuar se përpjekjet e tij diplomatike gëzojnë “mbështetje të jashtëzakonshme” dhe se kanë përkrahjen e “59 vendeve”.
Deklaratat e Trumpit erdhën pasi Forcat e Mbrojtjes së Izraelit njoftuan se terroristë të Hamasit kishin dalë nga një tunel në lindje të Rafahut dhe kishin sulmuar trupat e Brigadës Golani, të angazhuara në kërkimin e rrjeteve të tjera nëntokësore. Fillimisht, ushtarët panë një të dyshuar pranë një hyrjeje tuneli dhe e ndoqën, por rreth 30 minuta më vonë, të paktën pesë persona të armatosur dolën nga tuneli dhe hapën zjarr nga afër.
Sipas IDF-së, një prej sulmuesve hodhi një RPG ose vendosi një mjet shpërthyes mbi një mjet të blinduar Namer, duke plagosur katër ushtarë — një rëndë dhe dy mesatarisht. Një ushtar tjetër u lëndua lehtë. Forcat izraelite vranë të paktën dy prej sulmuesve, ndërsa të tjerët u tërhoqën në rrjetin e tuneleve.
Kryeministri Benjamin Netanyahu thirri një mbledhje sigurie pas asaj që zyrtarët e përshkruan si “shkelje flagrante” të armëpushimit nga Hamas. Izraeli njoftoi SHBA-në për incidentin dhe synimin e tij për t’iu përgjigjur ashpër.
Më vonë, ushtria izraelite tha se, bazuar në informacion nga Inteligjenca Ushtarake dhe Shin Bet, kreu një sulm ajror në jug të Gazës duke vrarë një terrorist të Hamasit si përgjigje ndaj shkeljes.
Media në Gaza raportoi të paktën katër sulme ajrore në perëndim të Khan Younis-it, me pretendime se gjashtë persona u vranë dhe disa të tjerë u plagosën në zonën me tenda në al-Mawasi. IDF tha se goditjet synuan depo armësh, objekte prodhimi, qendra komandimi dhe operativë të Hamasit, përfshirë komandantë.
