Ushtria e Libanit nxorri të enjten një deklaratë të pazakontë, duke mohuar raportimet që qarkulluan në mediat iraniane, sipas të cilave një pjesë e konsiderueshme e ushtarëve libanezë shërbejnë gjithashtu në Hezbollah.
Ushtria e quajti këtë pretendim të rremë dhe me qëllim të dëmtojë reputacionin e saj në një moment të ndjeshëm për vendin.
Deklarata erdhi pas raportimit nga Iran International, një medium i lidhur me opozitën iraniane, që publikoi më herët këtë muaj komentet e Hossein Mohammadi Sirat nga Universiteti Imam Sadiq në Teheran.
Në një faqe të lidhur me liderin suprem iranian Ali Khamenei, Sirat pretendoi se “30 për qind e ushtarëve libanezë janë anëtarë të Hezbollahut”, duke i përshkruar ata si trupa që veshin uniformën ushtarake gjatë ditës dhe iu bashkohen strukturave të Hezbollahut pas orarit të punës, përcjell Ynet.
Ushtria libaneze e hodhi poshtë këtë pretendim.
“Një faqe e huaj publikoi informacion që pretendonte lidhje ose besnikëri të personelit ushtarak ndaj një partie të caktuar,” tha ushtria.
“Komanda e Ushtrisë mohon vërtetësinë e këtij informacioni dhe konfirmon se gjithë personeli ndjek një doktrinë të qartë ushtarake dhe është besnik vetëm ndaj institucionit dhe kombit. I bëjmë thirrje të gjitha palëve të ndalojnë përhapjen e lajmeve që synojnë të dëmtojnë reputacionin e ushtrisë, veçanërisht gjatë këtij periudhe kritike.”
Komentet nga Teherani tërhoqën vëmendje të madhe në Liban, përfshirë edhe nga media që janë kundër Hezbollahut. MTV Lebanon e akuzoi Iranin për “nxitje të Izraelit” kundër Forcave të Armatosura të Libanit, duke argumentuar se deklaratat minojnë institucionin e vetëm kombëtar ushtarak të vendit.
Ky incident ndodh në një kohë të tensionuar mes Beirutit dhe Teheranit, ndërsa udhëheqja e re e Libanit, nën Presidentin Joseph Aoun, synon të forcojë ushtrinë, të rivendosë sovranitetin e shtetit dhe të pengojë ndërhyrjet e huaja, veçanërisht nga Irani.
Zyrtarët libanezë kanë kërkuar në mënyrë të përsëritur që Irani të mos ndërhyjë në çështjet e brendshme të Libanit.
Më tej, marrëdhëniet u tensionuan pas komenteve të figurave të larta iraniane për pasojat e vrasjes së shefit ushtarak të Hezbollahut, Ali Haythem Tabatabai, në lagjen Dahiyeh të Beirutit nga Izraeli.
Ministri i Jashtëm libanez, Youssef Raji, kritikoi publikisht homologun e tij iranian Abbas Araghchi, duke thënë: “Dëshiroja të besoja pretendimin tuaj se Irani nuk ndërhyn në çështjet e brendshme të Libanit, derisa një nga këshilltarët e liderit tuaj u shfaq për të na thënë çfarë ndodh këtu.”
Sipas raportimeve, Araghchi i dërgoi Raji një mesazh duke theksuar mbështetjen e vazhdueshme të Iranit për sovranitetin, unitetin kombëtar dhe integritetin territorial të Libanit, si dhe duke e ftuar në Teheran për të diskutuar zhvillimet rajonale dhe ndërkombëtare, duke shprehur besimin se Libani do të kapërcejë kërcënimet dhe sfidat ekzistuese.
