Samsung prezantoi të martën smartfonin e saj të parë me shumë palosje, duke synuar të forcojë pozicionin në tregun e pajisjeve të palosshme, ku konkurrenca po rritet ndjeshëm.
Lansimi i Galaxy Z TriFold përfaqëson përpjekjen më të fundit të kompanisë për t’i bërë ballë rivalëve kinezë, të cilët kanë fituar terren në këtë segment. Megjithatë, analistët paralajmërojnë se çmimet e larta dhe kompleksiteti i prodhimit e mbajnë teknologjinë e palosshme ende në kategorinë “e luksit”.
Modeli i ri, me një çmim rreth 2,440 dollarë, shpaloset në një ekran 253.1 mm, duke përdorur tre panele. Ekrani është pothuajse 25% më i madh se ai i modelit të mëparshëm premium, Galaxy Z Fold 7.
“Besoj se tregu i pajisjeve të palosshme do të vazhdojë të zgjerohet, dhe TriFold mund të funksionojë si katalizator për rritje më të fortë brenda këtij segmenti,” tha Alex Lim, zëvendëspresident ekzekutiv i Samsung Electronics dhe drejtues i shitjeve e marketingut në Korenë e Jugut. Ai theksoi se pajisja është projektuar për një grup specifik konsumatorësh dhe nuk pritet të jetë një produkt me volum të lartë shitjesh.
Galaxy Z TriFold, i prodhuar në Korenë e Jugut, do të dalë në shitje në vend më 12 dhjetor dhe do të nisë shpërndarjen në Kinë, Singapor, Tajvan dhe Emiratet e Bashkuara Arabe deri në fund të vitit. Prezantimi në SHBA parashikohet në tremujorin e parë të vitit të ardhshëm.
Pajisja vjen me baterinë më të madhe të Samsungut për modelet kryesore dhe mbështet karikimin super të shpejtë, i cili e çon baterinë në 50% brenda 30 minutash. Sipas Lim, rritja e çmimeve të çipave të memories dhe komponentëve të tjerë e bëri çmimin final të pajisjes një “vendim të vështirë”, shkruan Reuters.
