ABN Amro po planifikon të shkurtojë pothuajse një të katërtën e stafit të saj me kohë të plotë, pasi banka holandeze nis një rishikim të biznesit nën drejtimin e kryeshefes ekzekutive të re, Marguerite Bérard.
Banka tha të martën se do shkurtonte 5,200 role me kohë të plotë deri në vitin 2028 si pjesë e një strategjie të re për të ulur kostot dhe për të rritur fitimet.
ABN kishte rreth 22,000 punonjës me kohë të plotë në fund të vitit të kaluar dhe tha se gjysma e “reduktimit neto” në numrin e punonjësve do vinte nëpërmjet lëvizjes natyrale, pasi punonjësit largohen pa u zëvendësuar.
Banka tha se tashmë kishte shkurtuar rreth 1,000 role që nga fillimi i këtij viti.
“Ne e dimë se duhet bërë më shumë për të rritur fitimet dhe konkurrencën tonë,” tha Bérard, një ish-ekzekutive e BNP Paribas e cila u bë kryeshefja e parë ekzekutive femër e ABN në prill.
Si pjesë e rishikimit, ABN, e cila raportoi 2.4 miliardë euro fitime neto për vitin 2024, tha se do thjeshtonte operacionet e saj duke ulur numrin e entiteteve ligjore, duke hequr gradualisht sistemet e vjetra të teknologjisë dhe duke rritur përdorimin e inteligjencës artificiale.
Ristrukturimi është pjesë e ndryshimeve më të gjera në bankën me seli në Amsterdam, e cila u shtetëzua gjatë krizës financiare të vitit 2008 përpara se të riprivatizohej pjesërisht në vitin 2015, shkruan FT.
ABN u ble për 50 miliardë euro në vitin 2007 nga një konsorcium i udhëhequr nga Royal Bank of Scotland, një marrëveshje që e ngarkoi RBS-në me letra me vlerë toksike të mbështetura nga hipotekat dhe çoi në kolapsin e saj në vitin 2008.
Në shtator, qeveria holandeze e uli aksionin e saj në ABN në rreth 20 për qind nga më shumë se 30 për qind më parë. Aksionet e saj janë rritur rreth 80 për qind këtë vit.
