Të paktën pesë oficerë sigurie u vranë dhe dy të tjerë u plagosën të hënën, pasi persona të armatosur qëlluan ndaj autokolonës së guvernatorit të Taizit, Nabil Shamsan, njoftuan autoritetet lokale. Sipas zëdhënësit provincial Mohamed Abdel-Rahman, sulmi ndodhi në rrugën që lidh qytetin jugperëndimor me pjesën tjetër të vendit. Ai shtoi se gjatë shkëmbimit të zjarrit u vranë edhe dy nga sulmuesit, përcjell Euronews.
Zyra e guvernatorit deklaroi se forcat e sigurisë dhe ushtria po punojnë për të identifikuar dhe vënë para drejtësisë autorët e sulmit. Asnjë grup nuk ka marrë përgjegjësinë deri tani.
Qyteti i Taizit ka qenë për vite një nga pikat më të nxehta të luftës civile në Jemen, ku rebelët Houthi të mbështetur nga Irani dhe milicitë e lidhura me partinë islamiste Islah përballen me fraksione të tjera të përfshira në konfliktin e vendit. Taizi, i vendosur në kryqëzimin e dy autostradave të rëndësishme, ka qenë nën bllokadën e Houthive që prej vitit 2016.
Lufta në Jemen filloi në vitin 2014, kur Houthitë morën kontrollin e kryeqytetit Sana nga bastioni i tyre në Saada, duke detyruar qeverinë e njohur ndërkombëtarisht të shpërngulej në ekzil. Një vit më vonë, një koalicion i udhëhequr nga Arabia Saudite ndërhyri për të rikthyer qeverinë. Në vitet e fundit, frontet janë ngurtësuar, ndërsa marrëveshja mes Houthive dhe Arabisë Saudite ka reduktuar sulmet ndërkufitare nga të dyja palët.
