Presidenti amerikan Trump tha të hënën se ka pranuar një ftesë nga udhëheqësi kinez Xi Jinping për të vizituar Pekinin në prill dhe se ai i është përgjigjur me një ftesë për Xi-n për një vizitë shtetërore në SHBA më vonë vitin e ardhshëm.
Trump e bëri njoftimin pasi foli me Xi-në në telefon, gati një muaj pas takimit të tyre personalisht në Korenë e Jugut. Ai tha se diskutuan çështje duke përfshirë Ukrainën, fentanilin dhe blerjet e sojës amerikane.
“Marrëdhënia jonë me Kinën është jashtëzakonisht e fortë!” shkroi Trump në një postim në Truth Social.
Pekini, i cili e njoftoi i pari telefonatën, nuk tha asgjë për vizitat shtetërore, por konfirmoi se të dy krerët diskutuan tregtinë, Tajvanin dhe Ukrainën. Xi i tha Trump-it se kthimi i Tajvanit në Kinën kontinentale është “një pjesë integrale e rendit ndërkombëtar të pasluftës” dhe shprehu shpresën për një “marrëveshje paqeje të drejtë, të qëndrueshme dhe detyruese” në Ukrainë, sipas Ministrisë së Jashtme të Kinës.
Biseda përkoi me përpjekjen e fundit të administratës Trump për t’i dhënë fund luftës në Ukrainë dhe ndërkohë që marrëdhëniet Kinë-Japoni kanë rënë në një nivel të ri të ulët pas komenteve të fundit nga kryeministrja japoneze Sanae Takaichi.
Ajo tha se ushtria në Japoni, një aleat kyç i SHBA-së, mund të përfshihej në luftë nëse Kina do ndërmerrte veprime kundër Tajvanit, ishullit të vetëqeverisur që Pekini thotë se duhet të bashkohet me Kinën kontinentale, shkruan AP.
