Ish-drejtori i FBI-së James Comey majtas, prokurorja e përgjithshme e Nju Jorkut Letitia James
Një gjykatëse federale hodhi poshtë rastet penale kundër ish-drejtorit të FBI-së James Comey dhe Prokurores së Përgjithshme të Nju Jorkut, Letitia James, të hënën.
Sipas saj, Prokurorja e Përkohshme e SHBA-së Lindsey Halligan ishte emëruar në mënyrë të parregullt në pozicionin e saj dhe “nuk kishte autoritet të ligjshëm” për të ngritur aktakuza ndaj dyshes.
Avokatët e Comey dhe James kishin argumentuar se Halligan duhej të konfirmohej nga Senati pasi Prokurorja e Përgjithshme Pam Bondi kishte shpenzuar periudhën e saj të lejuar prej 120 ditësh të emërimit të përkohshëm për Erik Siebert, i cili dha dorëheqjen më 19 shtator pasi presidenti Trump e kritikoi publikisht atë për mosngritjen e akuzave kundër ish-kreut të FBI-së.
Të dy aktakuzat u rrëzuan pa paragjykim, gjë që zakonisht nënkupton se rastet mund të ngrihen sërish.
Megjithatë, vendimi i Gjykatëses së Lartë të Qarkut të SHBA-së, Cameron Currie, vjen pas skadimit të afatit pesëvjeçar të parashkrimit kundër Comey-t, që do të thotë se rasti kundër tij nuk mund të rihapet.
“Jam e gëzuar nga fitorja e sotme dhe mirënjohëse për lutjet dhe mbështetjen që kam marrë nga i gjithë vendi,” tha James, e cila përballej me deri në 60 vjet burg me akuza për mashtrim bankar dhe dhënie të deklaratave të rreme në një institucion financiar.
“Unë mbetem e patrembur përballë këtyre akuzave të pabaza ndërsa vazhdoj të luftoj për nju jorkezët çdo ditë.”
Currie, një ish-gjykatëse federale e Karolinës së Jugut e emëruar në detyrë nga presidenti Bill Clinton, dëgjoi argumentet për rastin më 13 nëntor dhe tregoi se ishte dashamirëse ndaj të pandehurve.
Avokati mbrojtës i James, Abbe Lowell, argumentoi se qëndrimi i qeverisë për emërimet do t’i jepte administratës Trump “aftësinë e përjetshme” për të emëruar prokurorë pa pasur nevojë që Senati të përmbushë funksionin e tij të “këshillimit dhe pëlqimit”.
Në një moment të seancës, gjykatësja Currie pyeti prokurorin Henry Whitaker nëse një gjykatës në Florida kishte gabuar duke rrëzuar një rast kundër Trump me akuza për grumbullim të dokumenteve të sigurisë kombëtare në resortin e tij Mar-a-Lago, me arsyetimin se këshilltari i posaçëm i atëhershëm Jack Smith ishte emëruar në mënyrë jokushtetuese nga Prokurori i Përgjithshëm i atëhershëm i SHBA-së, Merrick Garland.
“A besoni se rasti SHBA kundër Trump u vendos gabimisht?” pyeti Currie, duke shkaktuar pëshpëritje të ngazëllyera nga disa në galerinë e sallës së gjyqit.
Urdhri i të hënës ka të ngjarë të nxisë një proces apeli që mund të çojë në largimin nga postet e tyre të tre prokurorëve të tjerë në detyrë – Alina Habba e Nju Xhersit, Sigal Chattah e Nevadës dhe Bill Essayli i Los Anxhelosit.
Të tre kanë qenë në detyrë për më shumë se 120 ditë dhe nuk janë konfirmuar.
James, 67 vjeç, u akuzua se bleu një shtëpi me tre dhoma gjumi dhe një banjo në Norfolk, më 17 gusht 2020, duke përdorur një kredi prej 109,600 dollarësh, shkruan NY Post.
James gjoja tha se do ishte “huamarrësja e vetme që do e zinte dhe përdorte pronën”, kur në të vërtetë mbesa e saj jetonte atje dhe paguante qira, pretenduan federalët.
Comey, 64 vjeç, u akuzua për gënjeshtra në Kongres dhe pengim të drejtësisë për deklaratat në një seancë dëgjimore të Komitetit Gjyqësor të Senatit më 30 shtator 2020, rreth zbulimeve në shtyp që përfshinin hetime të profilit të lartë të agjencisë.
Si Comey ashtu edhe James kishin deklaruar se ishin të pafajshëm dhe pretenduan se ishin vënë në shënjestër nga Trump për shkak të hetimeve të tyre të kaluara kundër tij.
Avokatët e Comey nuk iu përgjigjën menjëherë kërkesave për koment të hënën. Një zëdhënës i zyrës së Halligan gjithashtu nuk iu përgjigj një kërkese për koment.
