Presidenti i Real Madridit, Florentino Pérez, ka paraqitur planet për të shitur 5 për qind të klubit përmes një filiali të sapokrijuar si pjesë e një përpjekjeje revolucionare për të sjellë investitorë të jashtëm për herë të parë.
Në mbledhjen vjetore të klubit të futbollit të dielën, Pérez u tha disa prej 100,000 anëtarëve që e zotërojnë atë se do t’i linte të votonin për planin në një mbledhje të jashtëzakonshme në të ardhmen e afërt, duke thënë se investitorët e rinj duhet “të na ndihmojnë të mbrojmë trashëgiminë tonë nga sulmet e jashtme”.
Plani përfaqëson ndryshimin më të madh të pronësisë në historinë 123-vjeçare të Real Madridit, një klub futbolli me një bazë të madhe tifozësh globalë, qindra miliona ndjekës në mediat sociale dhe të ardhura prej 1.1 miliardë eurosh vitin e kaluar, më të lartat nga çdo ekip në botë.
Kjo vjen pasi aksionet financiare në futboll vijojnë të rriten. Klubet e Premier League në Angli shpenzuan shumë më tepër se rivalët e tyre spanjollë për lojtarë të rinj këtë verë, ndërsa grupi investues amerikan Apollo arriti një marrëveshje këtë muaj për të blerë një aksion mazhoritar te rivali i Realit, Atlético Madrid.
Pérez tha se klubi do duhet të krijojë një filial të ri që do zotërohet nga anëtarët ekzistues, ose socios, dhe do shesë një aksion prej “rreth 5 për qind” tek një investitor ose disa investitorë.
Duke kërkuar të shmangë shqetësimet e mundshme, ai tha se aksionet e investitorëve të jashtëm do të ishin “simbolike” dhe “të kufizuara” dhe shtoi se aksionarët e rinj duhet “të respektojnë vlerat tona, të kontribuojnë në rritjen e klubit dhe të na ndihmojnë të mbrojmë trashëgiminë tonë nga sulmet e jashtme”.
Nëse aksionarët e rinj dëshirojnë të shesin aksionet e tyre, Real Madridi do ketë gjithmonë të drejtën e parë për t’i blerë ato, tha ai.
“Ne duhet të shmangim humbjen e pronësisë dhe kontrollit të fatit të klubit te disa individë, siç ka ndodhur me klube të tjera,” tha Pérez.
Ai tha se ndryshimet korporative do “njohin zyrtarisht” 100,000 anëtarët ekzistues si “pronarët e vërtetë” të klubit, duke e fiksuar atë numër dhe gjithashtu duke i vënë një çmim vlerës së anëtarësimit, shkruan FT.
“Mbajtja e një karte anëtarësimi të Real Madridit nuk do jetë më vetëm një çështje sentimentale,” tha Pérez.
“Ajo gjithashtu do ketë një vlerë të prekshme dhe të vërtetë.”
Biznesmeni miliarder tha se kur iu bashkua klubit në vitin 2000, ai ishte praktikisht në falimentim dhe “madje më është dashur të garantoj personalisht 147 milionë euro nga asetet e mia për ta shpëtuar” atë.
Me ndryshimet e planifikuara të pronësisë “askush nuk do jetë në gjendje të zbehë statusin tonë si pronarë ose të ndryshojë ekuilibrin që garanton pavarësinë dhe qëndrueshmërinë e Real Madridit,” tha Pérez.
