Një eksperte e Kombeve të Bashkuara për të drejtat e njeriut ka bërë thirrje që Shtetet e Bashkuara të heqin sanksionet e gjata ndaj Kubës, duke cituar ndikimin e tyre tek popullsia e ishullit, përfshirë në arsim, sigurinë ushqimore dhe kujdesin shëndetësor. Alena Douhan, Raportuese Speciale e Këshillit të të Drejtave të Njeriut të OKB-së, i bëri këto deklarata të premten gjatë një vizite zyrtare në Kubë, përcjell DW.
Douhan tha se është vërejtur një “përkeqësim i mëtejshëm” në të gjitha sektorët në Kubë për shkak të kufizimeve tregtare dhe financiare që Uashingtoni ka vendosur që nga epoka e Luftës së Ftohtë. Sipas saj, embargoja nuk përputhet me një sërë normash ndërkombëtare dhe ka “përkeqësuar ndjeshëm situatën humanitare”, duke synuar t’i pengojë Kubës çdo burim të ardhurash, sidomos në valutë të fortë.
Komentet e saj vijnë një muaj pasi shumica dërrmuese e shteteve anëtare të OKB-së miratuan për të 33-in vit radhazi një rezolutë që kërkon heqjen e bllokadës ekonomike. Gjatë vizitës së saj, Douhan tha se ka takuar shumë qytetarë dhe përfaqësues të sektorit publik e privat për të vlerësuar ndikimin e embargo-s, duke theksuar se inflacioni i lartë dhe mungesa e burimeve e vështirësojnë edhe sigurimin e ushqimit të mjaftueshëm për familjet me të ardhura të ulëta.
Që nga viti 2020, Kuba po përballet me një krizë të thellë ekonomike dhe energjetike, me rënie të PBB-së, mungesa ushqimi dhe ndërprerje të gjata të energjisë elektrike. Autoritetet kubane thonë se kriza buron nga vështirësitë e pandemisë, por edhe nga ashpërsimi i sanksioneve amerikane. Embargoja u vendos në vitin 1960, pas revolucionit të Fidel Castros, që përmbysi diktatorin Batista dhe shtetëzoi prona të korporatave dhe qytetarëve amerikanë.
Uashingtoni, nga ana tjetër, fajëson qeverinë komuniste të Kubës për gjendjen ekonomike, duke këmbëngulur se embargoja nuk e pengon vendin të tregtojë me botën dhe se ligji amerikan lejon eksportin e ushqimeve dhe pajisjeve mjekësore. Sanksionet u ashpërsuan edhe më tej gjatë administratës së Donald Trump, e cila e riktheu Kubën në listën amerikane të shteteve sponsore të terrorizmit.
