Ministri i Jashtëm i Polonisë tha të dielën se një ankand “fyes” i sendeve të Holokaustit është anuluar në Gjermani, duke përcjellë informacionin nga homologu i tij gjerman, pas ankesave nga të mbijetuarit e Holokaustit.
Radoslaë Sikorski i bëri komentet në platformën X, duke thënë se ai dhe ministri i Jashtëm gjerman, Johann Wadephul, “ranë dakord se një skandal i tillë duhet të parandalohet.” Diplomati i lartë polak falënderoi Wadephul për informacionin se ankandi u anulua.
Më herët, një grup i të mbijetuarve të Holokaustit i bëri thirrje shtëpisë gjermane të ankandeve Felzmann të anulonte shitjen e së hënës të qindra objekteve të Holokaustit, duke përfshirë letra të shkruara nga të burgosurit dhe dokumente të tjera që identifikonin shumë njerëz me emër.
Një listim i informacionit rreth ankandit në faqen e Auktionhaus Felzmann të dielën në mëngjes nuk ishte më në faqe nga mesi i pasdites. Shtëpia nuk iu përgjigj menjëherë telefonatave, një emaili dhe një mesazhi me tekst të dielën, shkruan CNN.
Koleksioni prej mbi 600 llotesh në ankand në Neuss-in perëndimor, pranë Düsseldorf-it, përfshinte letra të shkruara nga të burgosurit nga kampet gjermane të përqendrimit drejtuar të dashurve në shtëpi, kartela indeksi të Gestapos dhe dokumente të tjera të autorëve, raportoi agjencia gjermane e lajmeve DPA. Ankandi titullohej “Sistemi i Terrorit”.
“Për viktimat e persekutimit Nazist dhe të mbijetuarit e Holokaustit, ky ankand është një sipërmarrje cinike dhe e paturpshme që i lë të indinjuar dhe pa fjalë,” tha Christoph Heubner, zëvendëspresident ekzekutiv i Komitetit Ndërkombëtar të Aushvicit, një grup i të mbijetuarve me qendër në Berlin, në një deklaratë të shtunën.
“Historia e tyre dhe vuajtjet e të gjithë atyre që u persekutuan dhe u vranë nga Nazistët po shfrytëzohen për fitim,” shtoi ai. Komiteti tha se emrat e individëve ishin të identifikueshëm në shumë prej dokumenteve.
Heubner tha se dokumente të tilla të persekutimit dhe Holokaustit “u përkasin familjeve të viktimave. Ato duhet të shfaqen në muze ose ekspozita përkujtimore dhe të mos degradohen në mallra të thjeshta.”
