Dhoma e Përfaqësuesve votoi me shumicë dërrmuese të martën për të detyruar publikimin e materialeve hetimore federale mbi trafikantin famëkeq të seksit, Jeffrey Epstein, pasi Kryetari i Dhomës, Mike Johnson i kërkoi Senatit të “korrigjojë” projektligjin dhe të sigurojë “mbrojtje të duhura për të pafajshmit”.
Masa, e cila kaloi me 427 vota pro dhe 1 kundër, do detyronte Departamentin e Drejtësisë të dorëzojë të gjitha “regjistrimet, dokumentet, komunikimet dhe materialet hetimore të paklasifikuara” dhe të gjithë informacionin e klasifikuar në masën maksimale të mundshme, brenda 30 ditëve nga hyrja në fuqi e ligjit.
Akti i Transparencës së dosjeve Epstein, i cili u prezantua nga Përfaqësuesit Thomas Massie dhe Ro Khanna, do urdhëronte gjithashtu Prokuroren e Përgjithshme Pam Bondi të dorëzojë një listë të zyrtarëve qeveritarë dhe “personave të tjerë të ekspozuar politikisht” të lidhur me Epstein brenda 15 ditëve.
“Republikanët po lënë faktet të flasin vetë dhe po ndjekin drejtësinë për viktimat e këtyre krimeve të neveritshme,” tha për NY Post kryesuesi i Shumicës në Dhomë, Tom Emmer, përpara se të akuzonte Demokratët se po përdorin viktimat e Epstein “si levë politike” kundër presidentit Trump dhe të tjerëve.
Ndërsa Trump tha të hënën se ishte i gatshëm të nënshkruante peticionin e shkarkimit në formën e tij aktuale, Johnson paralajmëroi të martën në mëngjes se ai “do hidhte mijëra dokumente me pakujdesi, pa mbrojtje të duhura për të pafajshmit”.
Katër Republikanë u bashkuan me 214 Demokratët e Dhomës për të marrë 218 nënshkrimet.
Një pjesë e këtij informacioni është publikuar si rezultat i hetimit të Komitetit Mbikëqyrës të Dhomës mbi materialet e Departamentit të Drejtësisë për Epstein, megjithëse me shumë redaktime. Dokumente të tjera dolën si pjesë e çështjeve federale kundër Epstein dhe bashkëpunëtores së tij, Ghislaine Maxwell.
