Qyteti veriperëndimor i Hungarisë, Győr, u kthye të shtunën në skenë të dy tubimeve paralele: një të kryeministrit Viktor Orbán dhe një të rivalit të tij kryesor opozitar, Péter Magyar, teksa të dy nisën fushatën e parakohshme për zgjedhjet e prillit, përcjell Euronews.
Orbán, i cili renditet pas Magyarit në shumicën e sondazheve, zhvilloi takimin e tij në Parkun Olimpik të Sporteve, ndërsa Magyar mblodhi mbështetësit në sheshin Vienna Gate. Kryeministri pritet të vizitojë pesë qytete deri në fund të vitit, ndërsa Magyar – ish-figura e brendshme e partisë Fidesz që u shfaq si rival i fortë politik vitin e kaluar – synon të kanalizojë pakënaqësinë e votuesve kundër qeverisë aktuale.
Në tubimin e tij, i quajtur “roadshow kundër luftës”, Orbán riktheu temat e intervistave të një dite më parë: gjendjen financiare të Hungarisë, rolin e vendit në raport me BE-në dhe mundësinë e ndalimit të luftës në Ukrainë. Ai paralajmëroi për “rreziqet e një lufte që po del jashtë kontrollit”.
Tubimet vijnë vetëm një javë pas vizitës së tij në Shtëpinë e Bardhë, ku Orbán mori një përjashtim njëvjeçar nga sanksionet amerikane për importin e naftës dhe gazit rus. Kryeministri e quajti këtë marrëveshje “një mburojë financiare” për Hungarinë. Por sa i përket kohëzgjatjes së përjashtimit—një vit apo më shumë—ai shmangu përgjigjet e drejtpërdrejta.
Nga ana tjetër, Péter Magyar, në tubimin e tij të quajtur “Rruga drejt fitores”, deklaroi se partia e tij Tisza është gati të qeverisë. Ai njoftoi se të hënën do të prezantojnë 106 kandidatët për zgjedhjet parlamentare, duke theksuar se procesi përfshiu profesionistë nga fusha të ndryshme, nga mjekë te punëtorë manualë. “Ne nuk do të lëmë askënd pas,” tha Magyar.
Kryetari i bashkisë së Győr-it u ofroi dy politikanëve mundësinë për një debat publik. Magyar e pranoi ftesën menjëherë, ndërsa Orbán e refuzoi, duke e cilësuar rivalin e tij si “politikan të kontrolluar nga Brukseli”.
Mbështetësit e Fidesz në qytet e mbështetën vendimin e kryeministrit, ndërsa votuesit e opozitës u shprehën se një debat është i domosdoshëm. “Shpresa vdes e fundit”, tha një simpatizant i Tiszës, duke shtuar se ende besojnë se përballja ballë për ballë mund të ndodhë.
Fushata pritet të intensifikohet ndërsa Hungaria i afrohet një prej zgjedhjeve më të pasigurta në vitet e fundit.
