Shqipëria u mposht 0-2 nga Anglia në ndeshjen e fundit të Grupit K kualifikues për Kupën e Botës 2026, që u luajt në stadiumin “Air Albania”.
Të dy golat u shënuan nga Harry Kane, i cili vazhdoi formën e shkëlqyer, duke shënuar 7 gola në tetë ndeshjet kualifikuese.
Ndeshja nisi e barabartë, por në minutën e 74’ Kane shënoi golin e parë pas një krosimi nga këndi që devijohet nga Aliji. Sërish ai shënoi në minutën e 82’ pas asistit të Rashford.
Shqipëria pësoi edhe një goditje emocionale me largimin e Armando Brojës nga fusha në minutën e 89’, për shkak të një dëmtimi, ndërsa sulmuesi shpërtheu në lot.
Pjesa e parë përfundoi 0-0, me disa mundësi për të dyja skuadrat, por Anglia dominoi pjesën e dytë, duke shfrytëzuar eksperiencën dhe forcat fizike.
Trajneri Sylvinho kishte bërë disa ndryshime nga ndeshja e mëparshme, duke ruajtur lojtarët me karton të verdhë për gjysmëfinalen e play-off-it të Kupës së Botës.
Me këtë fitore, Anglia përforcon renditjen si e para e Grupit K me 21 pikë, ndërsa Shqipëria, me 14 pikë, ka siguruar matematikisht zonën play-off për herë të parë në histori.
Afro 22 mijë tifozë ndoqën ndeshjen në “Air Albania”, duke krijuar një atmosferë festive përpara sfidës, ndërsa mbështetja për Kombëtaren ishte e dukshme deri në fund.
Formacionet zyrtare:
Shqipëria (4-3-3): Strakosha; Hysaj, Ismajli, Gjimshiti, Aliji; Asllani, Ramadani, Laçi; Hoxha, Bajrami, Uzuni – Trajner: Sylvinho
Anglia (4-3-3): Henderson; Burn, Quansah, Stones, O’Reilly; Bellingham, Wharton, Rice; Eze, Bowen, Kane – Trajner: Thomas Tuchel
Në përfundim, Anglia mbyll me tetë fitore ndaj Shqipërisë në përballjet historike mes dy skuadrave, ndërsa Kombëtarja shqiptare përgatitet për sfidat vendimtare të play-off-it.
