Ministri gjerman i Mbrojtjes, Boris Pistorius, deklaroi se sulmet e fundit të Rusisë ndaj Kievit tregojnë “përçmim ndaj njerëzimit” dhe përbëjnë shkelje të hapur të së drejtës ndërkombëtare, në një konferencë pas takimit të ministrave të mbrojtjes të Grupit Europian të Pesëshes (E5) në Berlin.
Në reagimin e tij, Pistorius u shpreh:
“Është mjaft e qartë që Putini synon ta bëjë dimrin sa më të padurueshëm për Ukrainën, të shkatërrojë moralin dhe të thyejë rezistencën e popullit ukrainas. Ai nuk po ia del.”
Shefi i mbrojtjes gjermane njoftoi gjithashtu se Berlini do të japë të paktën 150 milionë euro për listën e përparësive të NATO-s për nevojat urgjente të Ukrainës, duke financuar armë amerikane që pritet të dorëzohen së shpejti, përcjell The Guardian.
Komentet e tij vijnë vetëm një ditë pasi Danimarka, Estonia, Finlanda, Islanda, Letonia, Lituania, Norvegjia dhe Suedia shpallën një paketë të përbashkët financimi prej 430 milionë eurosh për Ukrainën.
Ndërkohë, gjatë natës, Rusia goditi çdo distrikt të Kievit me dronë dhe raketa, duke shkaktuar të paktën katër të vrarë dhe dhjetëra të plagosur, sipas autoriteteve lokale.
