Një sulm me kamikaz la të paktën 12 persona të vdekur dhe 27 të plagosur të martën në Islamabad, në një ngjarje që autoritetet pakistaneze e përshkruan si një përshkallëzim të dhunës militante dhe si provokim të drejtpërdrejtë ndaj qeverisë, përcjell Reuters.
Ngjarja ndodhi pranë hyrjes së një ndërtese gjyqësore në orët e mesditës, kur shpërthimi tronditi zonën dhe shkaktoi dëme të shumta në automjete dhe infrastrukturë. Pamjet nga vendi i ngjarjes treguan skena të rënda — njerëz të përlotur dhe të mbuluar me gjak, automjete të përfshira nga flakët dhe zona të rrethuar nga policia.
Ministri i Mbrojtjes, Khawaja Muhammad Asif, deklaroi pas sulmit: “Jemi në gjendje lufte.” Ai dhe zyrtarë të tjerë të qeverisë akuzuan drejtpërdrejt administratën talebane të Kabulit për përkrahje ose strehim të militantëve përgjegjës, një akuzë që Kabuli e mohoi dhe e dënoi sulmin.
Ministri i Brendshëm, Mohsin Naqvi, tha se autorët kishin qenë në kontakt me “handler”-ët e tyre në Afganistan gjatë operacionit dhe paralajmëroi për një përgjigje të ashpër nëse autoritetet afgane nuk veprojnë për të ndaluar militantët. “Nëse ata nuk i ndalojnë, nuk kemi tjetër zgjidhje përveç të veprojmë kundër tyre,” u shpreh Naqvi.
India e hodhi poshtë menjëherë çdo akuzë për përfshirje, duke e quajtur si të pabaza retorikën e udhëheqjes pakistaneze. Ndërkohë Talebanët në Kabul shprehën “trishtim dhe dënim” për viktimat, por nuk pranuan ndonjë rol në ngjarje.
Sulmi vjen në një kohë të tensionuar në rajon: vetëm një ditë më parë, një shpërthim në Nju Delhi la të vrarë tetë persona, duke nxitur spekulime se militantët po testojnë një valë të re të dhunës urbane. Grupi Tehreek-e-Taliban Pakistan (TTP) mohoi përfshirjen në ngjarjen e Islamabadit; përgjegjësia nuk u mor nga asnjë organizatë e njohur.
Ekspertët paralajmërojnë se taktikat e kohëve të fundit, përfshirë sulmet ndaj objektivave civile dhe institucionale, synojnë të përhapin frikë dhe të tregojnë se as kryeqytetet nuk janë më të sigurta. “Mesazhi është i qartë: nëse goditen baza në Kabul, as Islambadi nuk do të jetë i sigurt,” tha analisti Abdul Basit.
Përveç shpërthimit në Islamabad, autoritetet raportuan edhe një sulm të mëparshëm në qytetin Wana, ku një automjet vetëvrasës goditi hyrjen e një shkolle ushtarake dhe vrau tre persona — një sulm që analistët lidhin me përpjekjet për të riprodhuar skenarë tragjikë të së kaluarës.
Hetimet në terren vazhdojnë, ndërsa autoritetet po përpiqen të identifikojnë dhe arrestojnë përgjegjësit dhe të zbulojnë rrjetet mbështetëse prapa këtyre akteve. Qeveria paralajmëroi për masa të mundshme kundër atyre që dyshohet se ofrojnë strehë ose ndihmë, dhe tha se do të japë përgjigje të vendosur nëse akuzat për përfshirje nga territori afgan konfirmohen.
