Australia dhe Indonezia thanë se janë afër nënshkrimit të një traktati të ri dypalësh mbrojtës që do t’i angazhojë të dy vendet të konsultohen me njëra-tjetrën nëse ndonjëra prej tyre kërcënohet.
Presidenti indonezian Prabowo Subianto dhe kryeministri australian Anthony Albanese e bënë njoftimin në një konferencë të përbashkët për shtyp në Sydney gjatë vizitës së parë shtetërore të udhëheqësit indonezian në Australi të mërkurën.
Për çfarë kanë rënë dakord Australia dhe Indonezia?
“Qeveritë e Australisë dhe Indonezisë sapo kanë përfunduar në mënyrë thelbësore negociatat mbi një traktat të ri dypalësh mbi sigurinë tonë të përbashkët”, u tha Albanese gazetarëve në një deklaratë me Prabowo-n.
“Ky traktat do të angazhojë Australinë dhe Indonezinë të konsultohen rregullisht në nivel udhëheqësish dhe ministrash mbi çështjet e sigurisë, të identifikojnë dhe të ndërmarrin aktivitete sigurie me përfitim të ndërsjellë, dhe nëse siguria e njërit ose të të dy vendeve kërcënohet, të konsultohen dhe të shqyrtojnë se çfarë masash mund të merren individualisht ose bashkërisht, për t’u përballur me këto kërcënime”, tha Albanese.
Ai tha se të dy vendet e kishin kuptuar se veprimi bashkëpunues ishte mënyra më e mirë për të siguruar paqen dhe stabilitetin në rajon.
Albanese tha se shpresonte të nënshkruante traktatin e përfunduar gjatë një vizite në Indonezi në janar.
Nga ana e tij, Prabowo tha: “Fqinjët e mirë do të ndihmojnë njëri-tjetrin në kohë vështirësish dhe në kulturën indoneziane, kemi një shprehje, kur përballemi me një emergjencë, është fqinji ynë që do të na ndihmojë”.
“Vendosmëria jonë është të ruajmë marrëdhëniet më të mira në mënyrë që të forcojmë dhe garantojmë sigurinë për të dy vendet tona”, tha ai.
Në tetor, Australia nënshkroi një marrëveshje kyçe sigurie me një fqinj tjetër rajonal, Papua Guinenë e Re, sipas së cilës të dy kombet janë të detyruara t’i vijnë në ndihmë njëri-tjetrit nëse ndonjëra prej tyre sulmohet, shkruan DW.
Edhe kjo marrëveshje po shihet si një masë për të kundërshtuar ndikimin në rritje të Kinës në rajon.
Situatë e ndërlikuar sigurie
Australia dhe Indonezia nënshkruan marrëveshjen e tyre të parë të sigurisë 30 vjet më parë, por ajo u shfuqizua nga Indonezia në vitin 1999 pasi Australia dërgoi trupa në Timorin Lindor , atëherë nën sundimin indonezian, për të ruajtur rendin mes dhunës që shoqëronte lëvizjen e vendit për të fituar pavarësinë.
Që atëherë, midis dy vendeve janë nënshkruar disa marrëveshje të tjera sigurie, veçanërisht i ashtuquajturi Traktati i Lombokut i vitit 2006.
Megjithatë, Indonezia kohët e fundit ka bashkëpunuar edhe me vende që, ndryshe nga Australia, nuk janë aleate të SHBA-së.
Vitin e kaluar, ajo kreu stërvitje ushtarake njëkohësisht me Rusinë dhe Australinë.
Më herët këtë vit, Prabowo iu bashkua Presidentit kinez Xi Jinping, Presidentit rus Vladimir Putin dhe udhëheqësit të Koresë së Veriut Kim Jong Un në paradën më të madhe ushtarake të Kinës , pasi Indonezia dhe Kina zhvilluan ushtrime të përbashkëta “ndihme në rast fatkeqësish” në vitin 2024.
Indonezia është bërë gjithashtu kohët e fundit anëtare e BRICS, një grup që shihet gjerësisht si kundërpeshë ndaj G7, i cili përfshin Brazilin, Rusinë, Indinë, Kinën dhe Afrikën e Jugut.
