Mbi 2,700 fluturime janë anuluar të dielën në SHBA, ndërsa sekretari i Transportit, Sean Duffy, paralajmëroi se trafiku ajror mund të “ngadalësohet në pikë të fundit” nëse mbyllja e qeverisë federale vazhdon gjatë sezonit të udhëtimeve të Thanksgiving, përcjell AP.
Shtyrjet dhe anulimet janë përhapur në 40 nga aeroportet më të ngarkuara të vendit, ndërsa disa kontrolorë ajrorë që nuk kanë marrë pagë për thuajse një muaj kanë ndaluar së paraqituri në punë. Vetëm të dielën u raportuan afërsisht 10,000 vonesa fluturimesh, sipas FlightAware, ndërsa më parë janë anuluar mbi 1,500 fluturime të shtunën dhe mbi 1,000 të premten.
Aeroportet më të goditura përfshijnë Hartsfield-Jackson në Atlanta dhe Chicago O’Hare, ku kushtet dimërore rrezikojnë të përkeqësojnë situatën. Në New York, Newark dhe LaGuardia raportuan vonesa mesatare prej rreth 75 minutash. Në Detroit, bordet e nisjeve dhe mbërritjeve ishin të mbushura me vonesa dhe anulime, por stafi i sigurisë në aeroporte gjeti më pak pasagjerë në pritje.
Duffy paralajmëroi se, nëse mbyllja vazhdon dhe kontrolorët nuk paguhen për një periudhë të dytë, mund të nevojiten reduktime të fluturimeve deri në 20%, me mijëra anulime gjatë javës së festave. Ai tha se disa kontrolorë po përshpejtojnë daljet në pension, duke shtuar krizën: “Derisa ata të paguhen, situata vetëm do të përkeqësohet.”
Ndërhyrjet e mundshme të ushtrisë janë diskutuar, por nuk dihet nëse kontrolorët e saj mund të përdorin sistemet civile. Duffy mohoi akuzat se anulimet ishin taktika politike dhe tha se veprimet ishin të nevojshme për sigurinë e pasagjerëve.
Që nga 1 tetori deri më 7 nëntor, mungesa e kontrolorëve ka ndikuar mbi 4 milion pasagjerë të kompanive ajrore amerikane, sipas Airlines for America.
