Demokrati dhe socialisti i vetëshpallur Zohran Mamdani është zgjedhur kryebashkiaku i ri i Nju Jorkut, sipas projeksioneve të Fox News. Me këtë fitore, ai bëhet emigranti i parë mysliman dhe personi i parë me origjinë nga Azia Jugore që udhëheq qytetin më të madh të Shteteve të Bashkuara.
Mamdani, 34 vjeç, me origjinë nga Uganda dhe i rritur në Queens, tronditi skenën politike amerikane që në muajin qershor, kur fitoi papritur zgjedhjet paraprake të demokratëve ndaj ish-guvernatorit të Nju Jorkut, Andrew Cuomo. Gjatë fushatës, ai u mbështet nga figura të njohura të krahut progresist si Bernie Sanders dhe Alexandria Ocasio-Cortez, duke u angazhuar për një axhendë që ai e quajti “përballueshmëri për të gjithë”: ngrirje qirash, transport publik falas e të shpejtë, kopshte falas për fëmijët dhe tregje ushqimore të menaxhuara nga bashkia.
Fushata e Mamdanit është ndjekur nga afër edhe nga presidenti Donald Trump, i cili e ka quajtur “një komunist të çmendur 100%” dhe ka paralajmëruar se mund të presë fondet federale për qytetin nëse ai fiton. Mamdani iu përgjigj këtyre deklaratave duke thënë se “ky është një qytet i ndërtuar dhe udhëhequr nga emigrantë” dhe se “për të goditur njërin prej nesh, duhet të kalosh përmes të gjithëve.”
Pas fitores së tij, Cuomo pranoi humbjen, duke e quajtur fushatën e tij “një sinjal paralajmërues për drejtimin e rrezikshëm ku po shkon Partia Demokratike”.
Fitorja e Mamdanit ka thelluar përçarjen brenda vetë demokratëve në Nju Jork, ku figura të rëndësishme si Chuck Schumer e Hakeem Jeffries vonuan mbështetjen ndaj tij. Guvernatorja Kathy Hochul e mbështeti atë në fund të shtatorit, megjithëse ka refuzuar të miratojë kërkesën e tij për rritje taksash për korporatat dhe shtresat më të pasura.
Në fushatë, Mamdani është përballur edhe me kritika për qëndrimet e tij ndaj Izraelit dhe për komentet e mëparshme mbi policinë e Nju Jorkut, të cilën e kishte quajtur “të raciste dhe anti-queer”. Ai më vonë kërkoi falje publike, duke thënë se dëshiron të bashkëpunojë me oficerët e rendit.
Mamdani është gjithashtu kryebashkiaku i parë “milenial” i Nju Jorkut, i cili përdori në mënyrë të zgjuar rrjetet sociale si TikTok dhe Instagram për të mobilizuar votuesit e rinj dhe për të ndërtuar një imazh të ri të politikës urbane. Me ndihmën e influencerëve dhe figurave të njohura si Emily Ratajkowski, ai arriti të kthejë fushatën e tij në një fenomen digjital.
Fitorja e tij përfaqëson një kthesë të madhe për politikën e majtë amerikane — dhe një sfidë të re për demokratët tradicionalë të qytetit.
