Ministria e Jashtme kineze ka konfirmuar tani se Xi do të takohet me Trump në Korenë e Jugut të enjten.
Ministria tha se priste që takimi të sillte vrull në zhvillimin e qëndrueshëm të marrëdhënieve SHBA-Kinë.
Më herët gjatë ditës, Trump tha se mund të flasë me Xi-në rreth çipit të inteligjencës artificiale Blackwell të teknologjisë së fundit të Nvidia-s në takimin e tyre të pritur të enjten.
“Mund të jemi duke folur për këtë me Presidentin Xi”, tha Trump, duke shtuar se ishte “shumë optimist” për takimin e tij ballë për ballë me Xi, i pari që kur u kthye në Shtëpinë e Bardhë, shkruan Reuters.
Shitjet e çipave të inteligjencës artificiale të nivelit të lartë të firmës amerikane në Kinë kanë qenë një pikë kyçe ngecjeje në bisedimet e zgjatura tregtare midis dy ekonomive më të mëdha në botë këtë vit.
Pekini ka qenë prej kohësh i irrituar nga kontrollet e eksportit të Uashingtonit që i ndalojnë Nvidia-s të shesë çipat e saj më të përparuar të inteligjencës artificiale në Kinë.
SHBA-të i kanë justifikuar këto kufizime duke pretenduar se ushtria kineze do t’i përdorë çipat për të rritur aftësitë e saj.
Drejtori ekzekutiv i Nvidia-s, Jesen Huang, tha të martën se kompania e tij nuk kishte aplikuar për licenca eksporti nga SHBA-ja për të dërguar çipat e saj më të rinj në Kinë për shkak të qëndrimit kinez.
“Shpresoj që kjo të ndryshojë në të ardhmen sepse mendoj se Kina është një treg shumë i rëndësishëm”, tha Huang.
