Hamasi tha të martën se do shtyjë transferimin e trupit të një pengu izraelit, pak pasi forcat izraelite goditën objektiva në qytetin jugor të Gazës, Rafah, në përgjigje të një granatahedhësi dhe snajperi drejtuar një automjeti të Forcave Mbrojtëse Izraelite (IDF).
Grupi terrorist akuzoi Izraelin për “shkelje nga ana e okupatorit” dhe pretendoi se eshtrat ishin gjetur gjatë kërkimeve në tunele në Khan Younis. Vonesa shënon një tjetër përshkallëzim në prishjen e marrëveshjes së armëpushimit dhe shton zhgënjimin në rritje të Izraelit për atë që zyrtarët e shohin si taktika të qëllimshme zvarritëse nga Hamasi.
Incidenti vjen pak më shumë se një javë pasi dy ushtarë izraelitë u vranë në një sulm të ngjashëm me raketa antitank në Rafah. Kryeministri Benjamin Netanyahu zhvilloi dy takime të nivelit të lartë të sigurisë të martën, një para sulmit të fundit, ku diskutoi shkeljet e armëpushimit nga Hamasi, përfshirë vonesat në kthimin e trupave të pengjeve izraelitë.
Në një deklaratë pas incidentit, Netanyahu tha se ai kishte udhëzuar ushtrinë “të kryejë sulme të menjëhershme dhe të fuqishme” në Rripin e Gazës. Raportet palestineze më vonë konfirmuan sulmet ajrore në Rafah nga avionët luftarakë izraelitë.
Dhuna e ripërtërirë vjen pas zemërimit publik në Izrael për pamjet e publikuara nga ushtria që tregonin militantë të Hamasit duke inskenuar një dorëzim trupi te Kryqi i Kuq. Eshtrat, për të cilat thuhej se ishin të Ofir Tzarfati, tashmë i varrosur në Izrael pasi u gjet në një operacion ushtarak të mëparshëm, ishin rivarrosur nga Hamasi për efekt dramatik dhe më pas “rizbuluar” para vëzhguesve ndërkombëtarë.
Videoja, e publikuar të martën, tregon luftëtarë të Hamasit duke hapur një gropë, duke vendosur një thes me trup brenda dhe më pas duke thirrur stafin e Kryqit të Kuq në vendngjarje, në atë që Izraeli e dënoi si një “shfaqje manipuluese dhe poshtëruese”.
Hamasi më vonë pretendoi se do kthente trupin e një tjetër pengu të martën në mbrëmje, që thuhet se u gjet nga një tunel pranë Khan Younis. Pamjet nga agjencitë e medias ndërkombëtare treguan operatorë të maskuar të Hamasit, disa prej të cilëve mbanin bombola oksigjeni, duke gërmuar në vendin e ngjarjes dhe duke nxjerrë atë që ata thanë se ishte një thes me trup.
Sipas kushteve të marrëveshjes së armëpushimit, Hamasit iu kërkua të kthente të gjithë pengjet, të vdekur e të gjallë, brenda 72 orëve. Ndërsa u liruan 20 pengje të gjallë, janë kthyer vetëm 15 nga 28 pengjet e vdekur të mbajtur në Gaza. Izraeli akuzon Hamasin për vonesa të qëllimshme të kthimeve dhe gënjeshtra për paaftësinë e tij për të gjetur trupat e mbetur, prej të cilëve 13 besohet se janë ende në Gaza.
SHBA deri më tani ka kërkuar përmbajtje, me presidentin Donald Trump që thuhet se ka dërguar zyrtarë të lartë në Izrael për të parandaluar prishjen e armëpushimit. Të premten, Trump i dha Hamasit një afat 48-orësh për t’u pajtuar, shkruan Ynet.
